ग्वार्को फ्लाइओभर निर्माणका लागि ठेक्का सम्झौता भएको १९ महिना बित्दा देखिने गरी काममा केही प्रगति भएको छैन । जब कि सम्झौताअनुसार निर्माणको काम सक्न ५ महिना मात्र बाँकी छ । यस अवधिमा काम नसकिए सरकारी निकाय समय थप्ने तयारीमा छ । फ्लाइओभरका लागि सडक भत्काएर निर्माण थालेसँगै कोटेश्वर–सातदोबाटो–कलंकी सडक खण्ड भई ओहोरदोहोर गर्ने यात्रुले दैनिक सास्ती खेप्नुपरेको छ । यसले गर्दा घण्टौं ट्राफिक जाम हुँदा समयमै गन्तव्यमा पुग्न समस्या हुने गरेको छ ।
