व्यास नगरपालिका–१४ मा रहेको डुम्रैवेशी कुलुङ्ग खानेपानीको मुख्य मुहान पहिरोले बगाउँदा स्थानीय बासिन्दा खानेपानीबाट बन्चित भएका छन् । गत असार १७ गते परेको अविरल वर्षा पछि आएको पहिरोले खानेपानीको मुहानसँगै पानी जम्मा गर्ने ट्यांकी र त्यससँग सम्बन्धित उपकरणहरु बगाएपछि कुलुङ्ग आसपासका बासिन्दाहरु खानेपानीको सेवाबाट बन्चित भएका हुन् ।
७० घरधुरीले प्रयोग गर्ने उक्त खानेपानीको श्रोत नै अवरुद्ध हुँदा निकै अप्ठ्यारो भएको खानेपानी उपभोक्ता संस्थाका अध्यक्ष तरबहादुर थापाले बताउनुभयो । खानेपानीको समस्या भएपछि घण्टौ लगाएर टाढाको कुवावाट पानी लिन जानु परेको र जसले गर्दा दैनिकी नै खानेपानीको गुजारा गर्नमा बित्ने गरेको थापाले बताउनुभयो ।
२०७१ सालमा नेपाल सरकारको ६८ लाखको लगानी र जनश्रमदानबाट बनेको उक्त खानेपानी आयोजनाको ट्यांकीको लिफ्टिङ्गमा आवश्यक पर्ने उपकरण र विद्युतीय सामाग्री, पानी जम्मा गर्ने ईनटेन्क, फिल्टर सिस्टम, पानी लिफ्टिङ्ग गर्नका लागि प्रयोग भएको विद्युतीय पोल समेत बगाउँदा लामो समयदेखि स्थानीयहरु खानेपानी प्रयोग गर्न नपाएको खानेपानी उपभोक्ता संस्थाका अध्यक्ष थापाले बताउनुभयो ।
