काठमाडौं । च्याटजीपीटीलगायत आर्टिफिसियल इन्टेलिजेन्स (एआई) प्लेटफर्म बारे विश्वभर चर्चा /परिचर्चा भइरहेका बेला यूरोपिय मुुलुक इटालीले भने पूर्णरुपमा यसलाई प्रतिबन्ध लगाएको छ ।
इटालीको डेटा प्रोटेक्ट अथोरिटीले एडभान्सड च्याटबट ब्लक गर्ने आदेश दिएको छ । व्यक्तिगत डेटा सुरक्षा सम्बन्धि चिन्ता व्यक्त गर्दै उसले च्याट जीपीटीलाई प्रतिबन्ध लगाएको हो । अपर्याप्त डेटा सुरक्षासम्बन्धी चिन्ताका कारण इटालीले यो प्रतिबन्ध तत्कालैदेखि लागू हुने पनि एउटा ट्विटमा भनेको छ ।
हुन त यसलाई यूरोपियन मुलुक इटाली अघि चीन, रुस, इरान तथा उत्तरकोरियाले पनि प्रतिबन्ध लगाइसकेका छन् । पछिल्लो समयमा विभिन्न देशहरूले आफ्नो सरकारी डिभाइसमा च्याटजीपीटीमाथि प्रतिबन्ध लगाउने क्रम जारी छ । यही सूचीमा इटाली पनि थपिएको छ ।
पछिल्लो समय च्याटजीपीटी मोडेलको एआई टुलको प्रयोग बढ्दो छ । त्यसो त परीक्षणकाल अवस्थामा रहेकाले उक्त टुल अहिले निकै विवादित पनि छ । यसैबीच च्याटजीपीटीजस्ता एआईले श्रम बजारमा उथलपुथल ल्याउने अनुमान पनि गर्न थालिएको छ ।
अमेरिकी बहुराष्ट्रिय इन्भेष्टमेन्ट बैंक ‘गोल्डम्यान साक्स’ को अध्ययन अनुसार जेनेरेटिभ एआईहरुले विश्वको कुल गार्हस्थ उत्पादन १० वर्षको अवधिमा ७५ ले वृद्धि गर्ने देखिएको छ । यद्दपि, एआईका कारण विश्वका प्रमुख अर्थतन्त्रहरुमा ३० करोड मानिसको पूर्णकालीन रोजगारी धरापमा पर्नसक्ने पनि गोल्डम्यान साक्सको अनुसन्धानमा उल्लेख छ ।
अन्य मुलुकहरु भन्दा पनि संयुक्त राज्य अमेरिका र यूरोपमा भने यसको प्रभाव बढी देखिनेछ । त्यहाँ दुई तिहाइ काम एआईबाट स्वचालित रूपमा हुने अनुमान छ ।
च्याटजीपीटी गत नोभेम्बर २२ मा लन्च गरिएको थियो । एजेन्सी