भारतमा एकैदिन थपिए तीन लाख ३३ हजारभन्दा बढी कोरोना संक्रमित

माघ ९, नयाँ दिल्ली (भारत) । भारतमा पछिल्लो २४ घण्टामा कोरोना भाइरसका थप तीन लाख ३३ हजार ५३३ जना संक्रमित थपिएका छन् । यो सँगै भारतमा कोरोना शुरु भएयता हालसम्मको कुल संक्रमितको संख्या तीन करोड ९२ लाख ३७ हजार २६४ रहेको जानकारी दिइएको छ । भारतमा पछिल्लो केही हप्तादेखि दैनिक संक्रमितहरुको संख्यामा दिन प्रतिदिन वृद्धि हुँदै आइरहेको केन्द्रीय स्वास्थ्य तथा परिवार कल्याण मन्त्रालयले आइतवार जानकारी दिएको छ । सो मन्त्रालयका अनुसार भारतमा अहिले सक्रिय संक्रमित अवस्था २१ लाख ८७ हजार २०५ रहेको छ । पछिल्लो २४ घण्टामा भारतमा कोरोना भाइरसबाट दुई लाख ५९ हजार १६८ जना संक्रमणमुक्त भएका छन् । भारतमा अहिलेसम्म कोरोना भाइरसबाटmसंक्रमित भएर पनि अहिले संक्रमणमुक्त भएकाहरुको संख्या तीन करोड ६५ लाख ६० हजार ६५० पुगेको छ । यहाँ कोरोना भाइरस निको हुने दर ९३ दशमलव १८ प्रतिशत रहेको जानकारी दिइएको छ । पछिल्लो एक दिनमा ५२५ जनाको कोरोनाका कारण मृत्यु भएको छ भने अहिलेसम्म कोरोनाका कारण मृत्यु भएकाहरुको संख्या चार लाख ८९ हजार ४०९ रहेको छ । कोरोना शुरु भएदेखि हालसम्म भारतमा ७१ करोड ५५ लाख २० हजार भन्दाबढी व्यक्तिको कोरोना परीक्षण भएको छ ।  यहाँ सन् २०२१ को जनवरी १६ बाट कोरोना भाइरसविरुद्ध खोप अभियान सुुरु भएको थियो । सो समयदेखि हालसम्म एक अर्ब ६१ करोड ९२ लाख  ८४ हजारभन्दा बढीले कोरोनाविरुद्ध खोपको डोज लगाइएको छ । रासस/एएनआई