स्याङ्जा । जिल्ला अदालत स्याङ्जाले गत आर्थिक वर्ष (आव) २०७७/०७८ मा ५६१ मुद्दा फछ्र्योट गरेको छ । अघिल्लो आर्थिक वर्ष २०७६÷७७ देखि जिम्मेवारी सरेर आएका ३८० र गत आवमा दर्ता भएका ५८७ नयाँ सहित कुल ९४७ मुद्दामध्ये ५६१ ओटाको फैसला भएको जिल्ला अदालत स्याङ्जाका न्यायाधीश वसन्तराज पौडेलले बताए । अदातलबाट ३८६ ओटा मुद्दा फैसला गर्न बाँकी छ ।
जिल्ला अदालत स्याङ्जामा दर्ता भएका मुद्दामध्ये सबैभन्दा धेरै सम्बन्धविच्छेदका छन् । त्यसपछि क्रमशः अंशबण्डा, ज्यानसम्बन्धी, चोरी डकैती, लेनदेन, ठगी, जबर्जस्ती करणी, जालसाजी, वन, सवारी ज्यान मुद्दा, वहुविवाह लगायतका मुद्दा दर्ता भएको उनले बताए ।
अदालतमा २ वर्ष नाघेका मुद्दा २१ ओटा छन् भने १८ महीनादेखि २ वर्षसम्मका मुद्दा एउटा मात्रै छ । यस्तै १ वर्षदेखि १८ महीनासम्मका मुद्दा १४२ र ६ महीनादेखि १ वर्षसम्मका मुद्दा १३१ ओटा फैसला गर्न बाँकी रहेको न्यायाधीश पौडेलले बताए ।
फर्छ्योट हुन बाँकी रहेका ३८६ ओटा मुद्दामध्ये दुनियावादी देवानी २०७, सरकारवादी फौजदारी १२८, दुनियावादी फौजदारी ४९ र पुनरावेदन दुईओटा रहेको जिल्ला अदालत स्याङ्जाका स्रेस्तेदार विश्वप्रसाद रेग्मीले बताए । उना अनुसार गत आवमा अभियुक्तहरूबाट ४९२ वर्ष १ महीना कैद भुक्तानी भएको छ । यस्तै ३८ लाख ७७ हजार ३३८ जरीवाना फर्छ्योट भएको उनले बताए ।
