दोहोरो अंकले बढेको बजारमा तीन ओटा कम्पनीको शेयरमूल्यमा सर्किट

साउन १३, काठमाडौं । साताको चौथो कारोबार दिन बुधवार अघिल्लो कारोबार दिनको तुलनामा बजार  १५ दशमलव ३० अंकले वृद्धि भएको छ ।  कारोबारमा आएका २१९ ओटा कम्पनीमध्ये  तीन ओटा कम्पनीको शेयरमूल्यमा सकारात्मक सर्किट लागेको हो । यो दिन नारायणी डेभलपमेण्ट बैंक,मल्टीपर्पस फाइनान्स र चन्द्रागिरी हिल्स लिमिटेडको शेयरमूल्यमा सकारात्मक सर्किट लागेको हो । ती तीन ओटै कम्पनीको शेयरमूल्य अघिल्लो कारोबार दिनको तुलनामा १० प्रतिशतले वृद्धि भएको हो ।ती तीन ओटै कम्पनीको शेयरमा विक्रेताभन्दा क्रेता धेरै भएकाले शेयरमूल्य बढेको हो । नारायणी डेभलपमेण्ट कम्पनीको शेयरमूल्य प्रतिकित्ता रू.८०३ पुगेको छ । उक्त कम्पनीले शतप्रतिशत हकप्रद शेयर निष्कासन गर्ने तयारी गरिरहेको छ । कम्पनीले १३ लाख १२ हजार ३३८ कित्ता हकप्रद शेयर निष्कासन गर्नका लागि नियामक निकाय नेपाल धितोपत्र बोर्डमा निवेदन दिएको छ । विक्री प्रबन्धकमा भने ग्लोबल आइएमई क्यापिटल लिमिटेड रहेको छ । त्यसैगरी यो दिन मल्टीपर्पस फाइनान्सको शेयरमूल्य प्रतिकित्ता रू.५३४ दशमलव ८० र चन्दागिरी हिल्सको शेयरमूल्य रू.१ हजार ६३७ दशमलव ९० पुगेको छ ।