काठमाडौं। काठमाडौं विश्वविद्यालय (केयु)ले नवीनतम सोच भएका परियोजनाका लागि १ करोड ४० रुपैयाँ लगानी गर्ने भएको छ । केयुले स्थापना गरेको इन्कुबेसन सेन्टर र नर्वे सरकारको सहयोग रहेको ‘इनर्जाइज नेपाल’ले नवीनतम सोचसहितको विभिन्न व्यवसायको प्रवर्द्धनका लागि लगानी गर्ने भएका हुन् । नवीनतम सोचदेखि व्यापारसम्म सहायता कार्यक्रम अन्तर्गत इनर्जाइज नेपालले विनियोजन गरेको ४० लाख रुपैयाँ ऊर्जासँग सम्बन्धित नवीनतम सोच (इन्नोभेटिभ आइडिया)लाई मात्र व्यापारमा परिणत गर्न उपलब्ध गराइनेछ । यस अन्तर्गतका परियोजनामा वित्तीय स्रोतका लागि सबै नेपाली नागरिकले आवेदन दिन सक्नेछन् । यसैगरी विश्वविद्यालय अनुदान आयोगको १ करोड रुपैयाँ ऊर्जा लगायत क्षेत्रमा भएका सोचलाई व्यवसायमा परिणत गर्न उपलब्ध गराइनेछ ।
यसअन्तर्गत वित्तीय स्रोतका लागि भने केयुसँग आबद्ध विद्यार्थी, कर्मचारी, विभागीय कर्मचारी लगायतले मात्र आवेदन दिन पाउनेछन् । केयुका अनुसार प्रत्येक नवीनतम सोचलाई ५ लाख रुपैयाँ उपलब्ध गराइनेछ । उक्त कार्यक्रममार्फत २८ ओटा नवीनतम सोचलाई वित्तीय सहायता उपलब्ध गराइनेछ ।
केयुले स्थापना गरेको इन्कुबेसन सेन्टर र नर्वे सरकारको सहयोग रहेको ‘इनर्जाइज नेपाल’ले नवीनतम सोचसहितको विभिन्न व्यवसायको प्रवर्द्धनका लागि लगानी गर्ने भएका हुन् ।
सम्बन्धित परियोजनामा वित्तीय स्रोत उपलब्ध गराउन मंगलवारदेखि आवेदन खुला गरिएको छ । आवेदन दिने समयसीमा डिसेम्बर ३१ सम्म रहेको छ । लगानीयोग्य परियोजनालाई आवेदन दिएको दुई हप्ताभित्रै वित्तीय स्रोत सुनिश्चित गरिने इनर्जाइज नेपालका आयोजना प्रबन्धक डा. विजय थापाले जानकारी दिए । ‘नवीनतम सोचमा आधारित व्यापार, व्यवसायको प्रवर्द्धन र रोजगारी सृजना गरी मुलुकको अर्थतन्त्रमा योगदान दिने उद्देश्यले उक्त कार्यक्रम शुरू गरेका हौं,’ उनले भने, ‘लगानीयोग्य प्रस्तावको मूल्यांकन दुई हप्ताभित्र हुनेछ । प्रस्तावित परियोजना लगानीयोग्य ठहरिएमा तुरुन्तै आर्थिक सहायता उपलब्ध गराइनेछ ।’
प्रस्तावित परियोजना लगानीयोग्य नभए पनि उनीहरूलाई प्राविधिक सहयोग भने उपलब्ध गराइने थापाले जानकारी दिए । केयुले प्रस्ताव आएपछिको मूल्यांकन गरी निर्णयका लागि तीनसदस्यीय समिति समेत गठन गरेको छ । यसअघि केयुअन्तर्गत इकुबेसन सेन्टरले १०, इनर्जाइज नेपालले ८ र नेपाल टेक्नोलोजी इन्नोभेसन सेन्टरले १० ओटा विभिन्न नवीनतम सोचमा लगानी गरिसकेका छन् । विशेषगरी ऊर्जा, कृषि, स्वास्थ्य र प्रविधि क्षेत्रमा उनीहरूले लगानी गरेका छन् । इनर्जाइज नेपालका अनुसार यस आयोजनामार्फत २०० भन्दा बढीले प्रत्यक्ष तथा अप्रत्यक्ष रोजगारी पाइसकेका छन् ।
लगानी गरेको रकमबाट आएको मुनाफा पुन: नवीनतम सोचमा आधारित परियोजनामा लगानी गर्नेगरी कार्यक्रम अघि बढाइएको प्रबन्धक थापाले जानकारी दिए । विद्यार्थी लगायतलाई उद्योग व्यवसायमा आकर्षित गरी रोजगारी सृजना र अर्थतन्त्रमा योगदान दिने उद्देश्यले केयुले सन् २०१५ इन्कुबेसन सेन्टर स्थापना गरेको थियो । इनर्जाइज नेपाल भने नर्वे सरकारको सहयोगमा नर्वेजियन राजदूतावासमार्फत अध्ययन, अनुसन्धान र नवीतम सोचको परियोजनाका लागि सञ्चालित कार्यक्रम हो ।
इनर्जाइज नेपालका केयु, हाइड्रो ल्याब, एनटिएनयु र सिन्टेफ साझेदार छन् । यसको व्यवस्थापन केयुले गर्दै आएको छ । यसअन्तर्गत क्षमता अभिवृद्धि र व्यापार व्यवसायमा अभिप्रेरित गर्न आर्थिक तथा प्राविधिक सहयोग गर्ने लक्ष्य राखिएको छ । यसका लागि नर्वे सरकारले ६५ करोड रुपैयाँ बराबरको सहायता उपलब्ध गराउने प्रतिबद्धता गरेको छ ।
