काठमाडौं । नेपाल चेम्बर अफ कमर्सले नेपालमा लगानीका लागि भियतनाम समक्ष आग्रह गरेको छ । प्रधानमन्त्री पुष्पकमल दाहालसँग भारत भ्रमणमा रहेको चेम्बर पदाधिकारी टोलीले नेपाल, भुटान र भारतका लागि भियतनामका राजदूत न्गुयेन थान हायसँग भेटवार्ता गरी यस्तो आग्रह गरेको हो ।
न्गुयेनसँगको भेटवार्तामा चेम्बरका अध्यक्ष राजेन्द्र मल्लले नेपाल र भियतनामबीच व्यापार अभिवृद्धि, लगानी प्रवद्र्धन, पर्यटन जस्ता क्षेत्रमा सहकार्य गर्नुपर्ने बताए । दुई मुलुकबीचको आर्थिक तथा कूटनीतिक सम्बन्ध प्रभावकारी र परिणाममुखी बनाउनुपर्नेमा उनले जोड दिए । नेपालमा बौद्ध सर्किट निर्माणका लागि आवश्यक पूर्वाधार बनाउन दुई देशको व्यापारिक समूहबीच सहकार्य गर्न समेत अध्यक्ष मल्लले राजदूत न्गुयेनसँग प्रस्ताव गरे ।
‘दुई मुलुकबीच कूटनीतिसँगै उच्चस्तरीय व्यापारिक साझेदारी हँुदै आएको छ, भियतनाममा बुद्धका अनुयायी पनि धेरै छन् । बौद्ध सर्किट बनाएर धार्मिक पर्यटन प्रवद्र्धन गर्न सकिन्छ ।’ चेम्बरका पदाधिकारीसँगको भेटमा राजदूत न्गुयेनले आफूले नेपालको भ्रमण छिट्टै गर्न लागेको सुनाए । नेपाल र भियतनामबीच व्यापारिक साझेदारी वृद्धि गर्न आफूले पहल गर्ने उनले बताए । भेटवार्तामा चेम्बर अध्यक्ष मल्लसहित निवर्तमान अध्यक्ष राजेशकाजी श्रेष्ठ, उपाध्यक्षहरू दीपक मल्होत्रा र उर्मिला श्रेष्ठको सहभागिता थियो ।
