काठमाडौं । विश्व सम्पदामा सूचीकृत वसन्तपुरको हनुमानढोका दरवार क्षेत्र आसपासमा अनधिकृतरूपमा सञ्चालित व्यापार–व्यवसाय बुधवारबाट हटाउन शुरु गरिएको छ ।
पुरातात्व विभागको निर्देशनमा दरबार क्षेत्रमा रहेको तलेजु भवानी मन्दिर आसपासमा सञ्चालित अनधिकृत रूपमा सञ्चालित कपडा, मोबाइल लगायतका पसल हटाउन थालिएको हो ।
विभागले अनधिकृतरूपमा सञ्चालित पसल हटाउन सूचना जारी गरेपछि कतिपय व्यापारीले सामान हटाउन शुरु गरेका छन् । कतिपयले भने हटाउने तयारीमा रहेको बताएका छन् ।
विभागको निर्देशनपछि सो क्षेत्र बुधवार सुनसानजस्तै देखिएको थियो । सो क्षेत्रका कतिपय पसल बन्द गरिएका थिए । कतिपय व्यापारी भने सामान बेच्न व्यस्त थिए ।
विभागका अनुसार अब सो क्षेत्रमा पुरातात्त्विक महत्त्व, कला, संस्कृति झल्कनेका वस्तुका पसल मात्र सञ्चालन गर्न पाइनेछ ।
यसअघि महानगरले पटकपटक सो क्षेत्रमा अनधिकृतरूपमा सञ्चालन भएका पसल हटाइनदिन पुरातात्व विभागलाई पत्राचार गरेको थियो । महानगरपालिकाले २०७९ माघ १४ गते अनधिकृत प्रयोजन हटाइदिन आग्रह गर्दै पुरातत्व विभागलाई पत्र पठाएको थियो ।
त्यसपछि महानगरपालिकाले सोही वर्षको चैत ५ गते हनुमानढोका आसपासका अनधिकृत पसल हटाउन विभागलाई ताकेता गरेको थियो । महानगरपालिकाले सोही चैत १२ गते वसन्तपुर दरवारक्षेत्र र तलेजु मन्दिर आसपासका व्यापरिक प्रयोजनको लागि राखिएका पसल हटाउन विभागलाई पत्राचार गरेको थियो ।
