फागुन ४, काठमाडौं । साताको चौथो कारोबार दिन बुधवार नेप्से परिसूचक अघिल्लो कारोबार दिनको तुलनामा १९ दशमलव ८४ अंकले घटेको छ ।
यो दिन नेप्से परिसूचक २७३४ दशमलव ४४ विन्दुमा झरेको हो । यो दिन कारोबारमा आएका २३१ ओटा धितोपत्रको ५६ लाख ५२ हजार १८२ कित्ता शेयर ३९ हजार ६६८ पटकमा रू. ३ अर्ब २ करोड ६३ लाख ३० हजार ७८४ दशमलव १४ मा खरीदविक्री भएको छ ।
यो दिन कारोबारमा आएका २३१ ओटा धितोपत्रमध्ये गुराँस लघुवित्त वित्तीय संस्थाको शेयरमूल्य सबैभन्दा बढी ३ दशमलव ४४ प्रतिशत वृद्धि भएको हो । कम्पनीको शेयरमूल्य प्रतिकित्ता रू. १ हजार ३५५ पुगेको छ । त्यसैगरी, दोस्रोमा ज्योति लाइफ इन्स्योरेन्स कम्पनीको शेयरमूल्य ३ दशमलव २३ प्रतिशत वृद्धि भएर रू. ६४० पुगेको छ ।
बुधवार सबैभन्दा बढी बुद्धभूमि नेपाल हाइड्रोपावरका शेयरधनीले गुमाएका छन् । कम्पनीको शेयरमूल्य अघिल्लो कारोबार दिनको तुलनामा आज ५ दशमलव ६९ प्रतिशत घटेसँगै सर्वाधिक गुमाएका हुन् । कम्पनीको शेयरमूल्य प्रतिकित्ता रू. ६४६ कायम भएको छ । शेयरमूल्य घट्ने दोस्रोमा मैलुङखोला जलविद्युत् कम्पनी रहेको छ । कम्पनीको शेयरमूल्य ५ प्रतिशत घटेर रू. ५७० मा झरेको छ ।
त्यसैगरी, बुधवार सर्वाधिक शेयर खरीदविक्री अपि पावर कम्पनीको भएको छ । कम्पनीको रू. २१ करोड १४ लाख बराबरको शेयर खरीदविक्री भएको हो । कम्पनीको शेयरमूल्य प्रतिकित्ता रू. ५२३ कायम भएको छ । त्यसैगरी, दोस्रोमा नेशनल हाइड्रोपावर कम्पनीको रू. १७ करोड ७८ लाख बराबरको शेयर खरीदविक्री भएको छ ।
कारोबारमा आएका १३ समूहगत परिसूचकमध्ये अन्य समूहको परिसूचक शून्य दशलमव ४४ प्रतिशत र जीवन बीमा समूहको शून्य दशलमव १४ प्रतिशत वृद्धि भएको छ भने बाँकी सबै समूहको परिसूचक घटेसँगै समग्र नेप्से परिसूचक घटेको हो ।
समूहगत परिसूचक घट्नेमा बैंकिङ समूहको शून्य दशमलव ३ प्रतिशत, व्यापार समूहको १ दशमलव ४७ प्रतिशत, होटल एण्ड टुरिजम समूहको १ दशमलव शून्य ८ प्रतिशत, विकास बैंक समूहको १ दशमलव ८४ प्रतिशत, हाइड्रोपावर समूहको २ दशमलव १८ प्रतिशत, वित्त समूहको १ दशमलव ८१ प्रतिशत, निर्जीवन बीमा समूहको शून्य दशमलव ८५ प्रतिशत, उत्पादन तथा प्रशोधन समूहको १ दशमलव ३६ प्रतिशत, लघुवित्त समूहको शून्य दशलमव ७७ प्रतिशत, म्युचुअल फण्ड समूहको शून्य दशलमव ४५ प्रतिशत लगानी समूहको परिसूचक १ दशमलव ६८ प्रतिशतका दरले घटेको हो ।
बुधवार राजनीतिक प्रभावले पनि शेयर बजारलाई असर पारेको जस्तो देखिएको छ । सोही कारण नेप्से परिसूचकसँगै कारोबार रकममा पनि कमी आएको छ । तर यस्तो प्रभाव भने अल्पकालिन रुपमा मात्र देखिने लगानीकर्ताहरु बताउँछन् ।
केहि दिनयता एमसीसी परियोजनाको कारण नेपालको राजनीति अस्थिर बनेको छ । एमसीसी संसदबाट पास गर्ने–नगर्ने अन्यौलका बीच शेयर लगानीकर्ता समेत पर्ख र हेरको अवस्थामा रहँदा बजार ओरालो लागेको देखिन्छ ।