काठमाडौं (अस) । राष्ट्रिय व्यावसायिक पहल (एनबीआई) को सहयोग र सहकार्यमा नेपालका निजी क्षेत्रको प्रयासबाट विभिन्न ६ वटा अस्पताललाई अक्सिजन प्लान्ट हस्तान्तरण गरिएको छ ।
टर्कीबाट आयात गरिएका ६ वटा प्लान्ट काठमाडौंसहित देशका विभिन्न स्थानमा रहेका सरकारी, अर्धसरकारी अस्पताललाई हस्तान्तरण गरिएको हो । यी प्लान्टबाट २०० बेडलाई पुग्ने अक्सिजन उत्पादन क्षमता रहेको एनबीआईले जनाएको छ ।
नेपाल ल्याइएको ६ वटै प्लान्ट कीर्तिपुरस्थित फेक्ट नेपालद्वारा सञ्चालित कीर्तिपुर अस्पताल, बालाजुको जनमैत्री अस्पताल, टेकुको शुक्रराज ट्रपिकल अस्पताल र बागमती प्रदेश अस्पताल हेटौंडालाई हस्तान्तरण गरिएको हो ।
काभ्रेको धुलिखेल अस्पताल र झापामा रहेको अस्पतालमा अर्को प्लान्ट हस्तान्तरण गर्ने एनबीआईको योजना छ ।
करिब ७ करोड ६८ लाख मूल्य बराबरको अस्टान ब्रान्डका ६ थान अक्सिजन प्लान्ट निजी क्षेत्रको पहलमा नेपालमा ल्याइएको हो । निजी क्षेत्रले कोभिड–१९ का कारण अक्सिजन अभाव भएका बेला अक्सिजन सिलिन्डरदेखि प्लान्टसम्म सहयोग गर्न सकिने योजनासहित खरिद प्रक्रिया अघि बढाएको थियो ।
दुई वर्ष वारेन्टी भएको अक्सिजन प्लान्ट जडानका लागि टर्कीबाट प्राविधिकसमेत ल्याइएको छ । यी प्लान्ट जडान भएपछि सीधै पाइप लाइनबाट अस्पतालका बेडमा अक्सिजन पठाउन सकिनेछ ।
