भारतमा दैनिक संक्रमित दरमा कमी, सक्रिय संक्रमितको संख्या पनि घट्यो

साउन २३, नयाँदिल्ली (भारत) । भारतमा कोरोनाभाइरसबाट दैनिक संक्रमितको संख्यामा कमी आएको छ ।             शुक्रवार सार्वजनिक गरिएको विवरणको तुलनामा शनिवार सार्वजनिक गरिएको विवरणमा दैनिक संक्रमितको संख्यामा कमी देखिएको हो ।             शुक्रवारभन्दा शनिवारको विवरणमा झण्डै ६ हजार कमी देखिएको सरकारी अधिकारीले जानकारी दिएका छन् । शनिवार सार्वजनिक गरिएको विवरणअनुसार पछिल्लो २४ घण्टामा भारतमा ३८ हजार ६२८ जना नयाँ संक्रमित थपिएका छन् । जवकी शुक्रवार सार्वजनिक गरिएको विवरणमा ४४ हजार ६४३ जना नयाँ संक्रमित भएको उल्लेख थियो ।             सरकारी अधिकारीका अनुसार पछिल्लो एकै दिनमा ४० हजार १७ जना कोरोना भाइरसबाट सङ्क्रमणमुक्त भएका छन् । एउटै समयावधिमा नयाँ संक्रमितको संख्याभन्दा संक्रमणमुक्त भएकाको संख्या धेरै भएकाले अहिले संक्रमित अवस्थामै रहेकाको संख्या घटेको छ ।             भारतमा अहिले सङ्क्रमित अवस्थामै रहेकाको कुल संख्या ४ लाख १२ हजार १५३ रहेको छ । जवकी अघिल्लो दिन ४ लाख १४ हजार १५३ रहेको थियो ।             सरकारी अधिकारीका अनुसार भारतमा अहिलेसम्म कुल संक्रमितको संख्या ३ करोड १८ लाख ९५ हजार ३८५ पुगेको छ । तीमध्ये १ दशमलव २९ प्रतिशत मात्रै अहिले संक्रमित अवस्थामै रहेका छन् । संक्रमित भएर पनि अहिले संक्रमणमुक्त भइसकेकाको संख्या भने ३ करोड १० लाख पुगेको भारतको केन्द्रीय स्वास्थ्य मन्त्रालयले बताएको छ ।             भारतमा अहिलेसम्म कोरोना भाइरसबाट संक्रमित भएर ४ लाख २७ हजार ३७१ जनाको मृत्यु भएको छ । तीमध्ये ६१७ जनाको पछिल्लो २४ घण्टामा मृत्यु भएको हो ।             अधिकारीहरुका अनुसार भारतमा अहिलेसम्म ४७ करोड ८३ लाख जनाको कोरोना परीक्षण गरिएको छ ।  भारतमा पछिल्लो एक दिनमा ४९ लाख ५५ हजार १३८ जनालाई कोरोनाभाइरस विरुद्धको खोप लगाइएको छ । योसँगै अहिलेसम्म खोप लगाएकाको संख्या ५० करोड १० लाख ९ हजार ६०९ पुगेको छ ।  रासस/ एएनआई