नेपालको आर्थिक वृद्धिदर ४.१ % रहने आईएमफको प्रक्षेपण

वैशाख १३, काठमाडौं । अन्तरराष्ट्रिय मुद्रा कोष (आईएमफ) ले सन् २०२२ मा नेपालको आर्थिक वृद्धिदर ४ दशमलव १ प्रतिशत कायम रहने प्रक्षेपण गरेको छ  । आईएमफले यो वर्ष नेपालका लागि बहुराष्ट्रिय निकायहरु विश्व बैंक र एशियाली विकास बैंकले यसअघि गरेको प्रक्षेपणको निकट रहेर  आर्थिक वृद्धिदरको प्रक्षेपण सार्वजनिक गरेको हो । यसअघि विश्व बैंकले पनि ३ दशमलव ७ प्रतिशत आर्थिक वृद्धिदर कायम रहने प्रक्षेपण गरेको थियो । तर सरकारले भने बजेटमार्फत ७ प्रतिशत हाराहारीको आर्थिक वृद्धिदर कायम गर्ने लक्ष्य लिएको छ । आइएमएफका अनुसार एशियाली भेगका विकासशिल मुलुकमा औसतः ५ दशमलव ४ प्रतिशतको आर्थिक वृद्धिदर कायम रहने छ । एशियाका विकसित मुलुकको भने २ दशमलव ७ प्रतिशत आर्थिक वृद्धिदर कायम रहने छ । आइएमएफका अनुसार दक्षिण एशियाली राष्ट्र अन्तर्गत भारतले ८ दशमलव २, बंगलादेशले ६ दशमलव ४, श्रीलंकाले २ दशमलव ६ प्रतिशतको आर्थिक वृद्धिदर प्राप्त गर्नेछ ।