म्याग्दी । म्याग्दीको अन्नपूर्ण गाउँपालिकामा रू. १ करोड ४० लाखको लागतमा तीनओटा खानेपानी आयोजना निर्माण शुरू भएको छ । गोर्खा वेलफेयर ट्रस्ट र उपभोक्ताको लागत साझेदारीमा निर्माण हुने आयोजनाबाट १०२ घरका ५११ बासिन्दा लाभान्वित हुनेछन् । रू. १ करोड ४० लाख १४ हजार लागतमा निर्माण शुरू भएको आयोजनाबाट उपभोक्ताको घर, विद्यालय र सार्वजनिक स्थलमा १०८ ओटा निजी धारा जडान गरिने गोर्खा वेलफेयर ट्रष्टका परियोजना प्रबन्धक बेलबहादुर गुरुङले जानकारी दिए ।
‘अन्नपूर्ण गाउँपालिकाको वडा नं ३ मा दाना बजार, द्वारी र ४ मा पटार खानेपानी आयोजना निर्माण शुरू भएको हो,’ उनले भने, ‘संस्थाले कुल लागतको ६३ देखि ६६ प्रतिशत साझेदारी गरेको छ ।’ यही फागुन महीनामा उपभोक्ता समितिसँग सम्झौता भएका आयोजना आगामी जेठ महीनाभित्र सम्पन्न गर्ने लक्ष्य राखिएको छ ।
रू. ६७ लाख ६७ लागत अनुमान गरिएको दाना बजार खानेपानी आयोजनाबाट निर्माण हुने ५१ धारामार्फत २३० बासिन्दा लाभान्वित हुनेछन् । रू. ४६ लाख ४० हजार ५५४ लागत अनुमान गरिएको द्वारी खानेपानी आयोजनामार्फत निर्माण हुने २६ धाराबाट ११२ र रू. २६ लाख ७४ हजार ३१४ लागत अनुमान गरिएको पटार खानेपानी आयोजनाबाट निर्माण हुने ३१ ओटा धाराबाट १५९ बासिन्दा लाभान्वित हुने संस्थाले बताएको छ । दानाबजार, द्वारी र पटारमा यसअघि बनेका खानेपानी आयोजनाको संरचना र वितरण प्रणाली जीर्ण हुँदा स्थानीयवासीलाई समस्या भएको थियो । सबै घरमा निजी धारासहितको खानेपानी आयोजना निर्माण हुन थालेपछि स्थानीय उत्साहित भएका छन् ।
गोर्खा वेलफेयर ट्रष्टले अन्नपूर्ण गाउँपालिकाको दशवर्षे खानेपानी सरसफाइ तथा स्वच्छता योजना पनि तयार पारेको गाउँपालिकाका अध्यक्ष भारतकुमार पुनले जानकारी दिए । हाल खानेपानी र सरसफाइको अवस्था, आवश्यकता समेटिएको योजनाको आधारमा खानेपानी तथा सरसफाइको पुहँच विस्तारको योजना तथा कार्यक्रम सञ्चालन गरिने अध्यक्ष पुनले बताए । खानेपानी विभागको मापदण्डअनुसार अन्नपूर्णका शतप्रतिशत नागरिकलाई स्वच्छ खानेपानी उपलब्ध गराउन २५ ओटा थप आयोजना निर्माण गर्नुपर्ने, ९ ओटा विभिन्न निकायमार्फत निर्माणाधीन र मौजुदासहितका आयोजनाका लागि रू. ८९ करोड बजेट आवश्यक पर्ने देखिएको छ । रासस
