ग्वार्कोमा ‘फ्लाई ओभर’ निर्माणका लागि प्रक्रिया अघि बढ्दै

ग्वार्काेमा ‘फ्लाई ओभर’ निर्माण प्रक्रिया अघि बढ्दै

काठमाडौं । ललितपुरको ग्वार्कोमा ‘फ्लाई ओभर’ निर्माणका लागि कम्पनी छनोटको काम अघि बढाइएको छ । निर्माणका लागि ठेक्का आह्वान गरिएकोमा ९ कम्पनीले आवेदन दिएका थिए । अहिले ठेक्का मूल्यांकनका क्रममा रहेको गुणस्तर, अनुसन्धान तथा विकास केन्द्रका प्रमुख प्रभात झाले बताए । नयाँ प्रकारको ठेक्का भएकाले ढिलोमा आगामी दुई सातासम्ममा टुंगो लाग्ने उनले जानकारी दिए । बोलपत्र हाल्ने कालिका कन्स्ट्रक्सनको अदालतमा मुद्दामा परेकाले उसलाई मूल्यांकनमा पार्ने कि नपार्ने भन्ने अन्योलका कारण केही समय ढिलाइ भएको थियो । अहिले समावेश गर्न निर्देशन आएको केन्द्रका इन्जिनियर सरोज वज्राचार्यले बताए । काठमाडौंका बढी व्यस्त सडकमा हुने सवारीसाधनको चाप कम गर्न सरकारले उपत्यकाका विभिन्न चोकमा ‘फ्लाई ओभर’ वा ‘अन्डरपास’ निर्माणका लागि अध्ययन गरेकोमा पहिलोपटक ग्वार्काेमा निर्माणको प्रक्रिया अघि बढाइएको हो । आठ लेन रहेको चक्रपथको बीचको चार लेनलाई माथि उचाल्न लागिएको केन्द्रले बताएको छ । बालकुमारीबाट आएका सवारीसाधनका लागि चार लेन उठाएर ग्वार्कोतिर लग्ने र अर्को चार लेन तल (अहिलेको भएको ठाउँमा) हुने इन्जिनियर वज्राचार्यले बताए । ‘फ्लाई ओभर’को लम्बाइ झन्डै ५०० मिटर र उचाइ ६ मिटर हुनेछ । माथि चढ्न र झर्न र्‍याम्प हुनेछ भने माथिल्लो भागमा सुपर स्ट्रक्चर हुनेछ । सरकारले गत आर्थिक वर्षको नीति तथा कार्यक्रममा उपत्यकामा व्यस्त सात चोकमा सवारीसाधनको आवागमन सजिलो बनाउन अध्ययन गर्न उल्लेख गरेकोमा केन्द्रले ग्वार्काे, सातदोबाटो र एकान्तकुना गरी तीन चोकमा अध्ययन गरेको थियो । परामर्शदाताबाट पहिलो चरणको अध्ययन भएपछि यसलाई आधार मानेर ग्वार्कोमा निर्माण अघि बढाइएको केन्द्रले बताएको छ । ती तीन ठाउँमध्ये पनि सबैभन्दा सजिलो हुने देखिएकाले अहिले ग्वार्काे छानिएको इन्जियियर वज्राचार्यको भनाइ थियो । विभागले चक्रपथका चोक–चोकमा ‘फ्लाईओभर’ वा ‘अन्डरपास’ निर्माण गरेर कुनै पनि ठाउँमा सवारीसाधन नरोकिने अवधारणा ल्याएको छ । विमानस्थल झरेर कलंकी पुग्दा कतै पनि सवारीसाधन नरोकिने गरी जान सक्ने बनाउने दीर्घकालीन योजना रहेको केन्द्रले बताएको छ । ‘फ्लाई ओभर’ बीएन्डबी अस्पताल नजिकैको ग्वार्कोबाट बालकुमारीको केही अघिसम्म रहनेछ । सरकारको आफ्नै लगानीमा निर्माण गर्न यो योजनामा नेपाली निर्माण व्यवसायीले नै काम गर्ने भएका छन् । अहिलेसम्म ‘फ्लाई ओभर’ निर्माणको अनुभव नेपाली व्यवसायीसँग नभए पनि गाडी हिँड्ने धेरै पुल बनाइसकेकाले जिम्मेवारी दिन लागिएको हो । संरचना निर्माण गर्ने अवधिमा सडकमा यातायात आवागमन अवरुद्ध नहोस् भन्नेमा ध्यान दिइएको छ । उनका अनुसार ठेक्का सम्झौता हुँदा कागजातमा निर्माण कम्पनीले निर्माणसँगै ट्राफिक व्यवस्थापनमा ध्यान दिनुपर्ने उल्लेख हुनेछ । निर्माणको अवधिमा मुख्य लेनभन्दा बाहिर रहेको ‘सर्भिस लेन’ प्रयोग हुनेछ । यहाँको चाप कम गर्न सकेसम्म सवारीसाधन अन्यत्र मोड्नुपर्न उनले बताए । रासस