काठमाडौं । नेपाल वायुसेवा निगम (नेपाल एयरलाइन्स)ले जापानको नारितामा सातामा तीन उडान गर्ने भएको छ । निगमले आगामी मे १ तारिखदेखि काठमाडौं–नारिता गन्तव्यमा सातामा तीन उडान गर्ने भएको हो । निगमले आइतवार, मंगलवार र शुक्रवार उडान गर्ने जानकारी दिएको छ । निगमले यसअघि सो गन्तव्यमा सातामा दुई उडान गर्दै आएको थियो ।
जापान सरकारको नियमानुसार आइतवार र मंगलवारको उडानमा १४० यात्रु र शुक्रवारको उडानमा १२० जना यात्रु मात्र बोक्न पाइनेछ । खासगरी कोभिड महामारी समान्य भएपछि हवाई यात्रुको चाप बढेको र मागको तुलनामा सिट संख्या न्यून रहेकाले उडान संख्या थप गर्न लागिएको निगमले बताएको छ ।
जहाजको क्षमताभन्दा करीब आधा कम क्षमतामा काठमाडौं–नारिता यात्रु बोक्नुपरेकाले हाल भाडादर केही महँगो भएको निगमको भनाइ छ ।
काठमाडौं–नारिता रूटमा करसहित बिजनेश क्लासमा १ लाख ५२ हजार रुपैयाँ र इकोनोमी क्लासमा १ लाख १९ हजार रुपैयाँ भाडादर कायम गरिएको छ । तोकिएको मूल्यभन्दा बढी भाडा लिई टिकट विक्री गरेको गुनासो आएकाले त्यस्तो भएको पाइए नियमानुसार कारबाही हुने पनि निगमले बताएको छ ।
कसैले बढी भाडा असुलेको पाइएमा यात्रुलाई प्रमाणसहित उजुरी गर्न निगमले अनुरोध गरेको छ । निगमले नारिता–काठमाडौं भने पूर्ण क्षमतामा उडान गरिरहेको छ । रासस
