मंसिर २१, काठमाडौं । बुधवार आइसिएफसि फाइनान्स लिमिटेड र स्वाभिमान लघुवित्त वित्तीय संस्था लिमिटेडले प्रस्ताव गरेको लाभांश सुरक्षित गर्ने अन्तिम दिन रहेको छ ।
यी कम्पनीहरुले प्रस्तावित लाभांश पारितका लागि वार्षिक साधारण सभाको मिति तय गरी उक्त सभा प्रयोजनका लागि मंसिर २३ गते बुक क्लोज गर्ने भएकाले मंसिर २२ गतेसम्म शेयर कायम गर्नुपर्ने भएको हो ।
आइसिएफसि फाइनान्सले वर्ष गत वर्षको मुनाफाबाट १४ प्रतिशत लाभांश प्रस्ताव गरेको छ । कम्पनी १० प्रतिशत बोनस शेयर र कर प्रयोजनका लागि समेत ४ प्रतिशत नगद लाभांश वितरणको प्रस्ताव गरेको हो ।
उक्त प्रस्ताव पारितका लागि आइसिएफसि फाइनान्सले पुस ५ गते वार्षिक साधारण सभा बोलाएको छ । कम्पनीले सभा र लाभांश प्रयोजनका लागि मंसिर २३ गतेदेखि सभा हुने दिनसम्म बुक क्लोज गर्ने भएको हो ।
त्यस्तै, स्वाभिमान लघुवित्तले ३२ दशमलव ३० प्रतिशत बोनस शेयर र कर प्रयोजनका लागि १ दशमलव ७० प्रतिशत नगद लाभांश गरी कुल ३४ प्रतिशत लाभांश प्रस्ताव गरेको छ ।
उक्त प्रस्ताव पारितका लागि स्वाभिमान लघुवित्तले पुस ८ गते वार्षिक साधारण सभा बोलाएको छ । स्वाभिमान लघुवित्तले भने मंसिर २३ गते एक दिन मात्र सभा प्रयोजनका लागि बुक क्लोज गर्न लागेको हो ।
हाल आइसिएफसि फाइनान्सको चुक्तापूँजी रू. १ अर्ब २ करोड ४२ लाख ६५ हजार र स्वाभिमान लघुवित्तको रू.९ करोड २० लाख ५० हजार रहेको छ । सोही पूँजीको आधारमा यी कम्पनीहरुले लाभांश वितरण गर्न लागेका हुन् ।