चैत १, काठमाडौं । नेपाली बजारमा सुनको मूल्य जसरी उकालो लागेको थियो त्यसैगरी ओरालो लाग्न थालेको छ ।
साताको तेस्रो कारोबार दिन मंगलवार प्रतितोला सुनको मूल्य १ हजार ८०० रुपैयाँले घटेको छ । सोमवार भने सुनको मूल्य प्रतितोला ५०० रुपैयाँले घटेको थियो ।
नेपाल सुनचाँदी व्यवसायी महासंघका अनुसार मंगलवार सुनको मूल्य प्रतितोला १ लाख ५०० रुपैयाँ कायम भएको छ । सोमवार सुनको मूल्य प्रतितोला १ लाख २ हजार ३०० रुपैयाँ कायम भएको थियो ।
यस्तै, मंगलवार चाँदीको मूल्य पनि प्रतितोला ३५ रुपैयाँले घटेको छ । यो दिन चाँदीको मूल्य प्रतितोला १ हजार ३८० रुपैयाँ कायम भएको छ । सोमवार चाँदीको मूल्य भने प्रतितोला १ हजार ४१५ रुपैयाँमा किनबेच भएको थियो ।
रुस र यूक्रेन बीचको यूद्धका कारण पछिल्लो साता सुनको मूल्यले उच्च विन्दु कायम गरेको थियो । अन्तरराष्ट्रिय बजारमा सुनको मूल्य बढेको थियो । नेपाली बजारमा पनि फागुन २५ गते प्रतितोला सुनको मूल्य अहिले सम्मकै उच्च अर्थात् १ लाख ५ हजार ५०० रुपैयाँमा कायम भएको थियो ।
सोमवार अन्तरराष्ट्रिय बजारमा पनि सुनको मूल्य घटेको छ । यो दिन न्यूयोर्क मर्कन्टाइल एक्सचेञ्जको कोमेक्स डिभिजनमा स्पट गोल्डको मूल्य प्रतिऔंस १ हजार ९३२ दशमलव ७१ डलर पुगेको छ ।
यसैगरी मंगलवार डलरको भाउ पनि घटेको छ । यो दिन १ डलरको विक्रीदर १२२ रुपैयाँ ८० पैसा कायम भएको छ । सोमवार भने १ डलरको विक्रीदर १२२ रुपैयाँ ८५ पैसा रहेको थियो ।
