सरकारले सप्तकोसीमा जेटबोट चलाउन नदीबीचमा रहेको ढुंगा (खुवालुङ) फुटाउने घोषणा गरेपछि यसको विवाद केही सातादेखि चर्किएको छ । यसै विवादबीच किरात राई यायोक्खाले किराती आस्थाको केन्द्र खुवालुङ फुटाउन नदिने बताएको छ ।
फागुन ८ गते विराटनगरमा आयोजित एक कार्यक्रममा प्रधानमन्त्री केपी शर्मा ओलीले सप्तकोसीमा सहजरुपमा जेटबोट चलाउन नदीको बीचमा रहेको खुवालुङ (ढुंगा) क्रेनको प्रयोग गरेर भए पनि फुटाउने उद्घोष गरेपछि यो चर्चा र विवादको विषय बन्न पुगेको हो ।
विवाद चर्किएसँगै खुवालुङ बचाउ अभियान पनि चलेको छ ।
यसअघि पनि जेटबोटबाट दुधकोसी नदीको दोलालघाटसम्म पुग्नका लागि बाधा दिने खुवालुङसहित नदीको बीचबीचमा भएका अन्य ढुङ्गाहरु पनि फुटाउनु पर्ने प्रयास जेटबोट संचालकहरुले गर्दै आएका थिए ।
प्रदेश १ का मुख्यमन्त्री शेरधन राईले खुवालुङ विवाद अनावश्यक रुपमा निकालिएको बताए । उनले किराती मुन्दुम र संस्कृतिसँग जोडिएको खुवालुङको सम्बन्धमा विवादको विषय नै नभएको बेला केही फुर्सदिलाहरुले अनावश्यक विवाद झिकेको बताएका छन् ।
