साउदी अरबको रक्षा मन्त्रालयले महिलाहरूले पनि देशको सेनामा भर्ती हुन पाउने अधिकारसम्बन्धी नयाँ घोषणा गरेको छ । महिलाहरू अब सेना, ल्यान्स कोर्पोरल्स, सर्जिएन्ट्स र स्टाफ सर्जिएन्ट्सका रुपमा कार्यरत हुन पाउनेछन् ।
अरेबियन पेनिसुलियाअवस्थित साउदी अरेबियाका महिलाहरूले साउदी अरेबियन आर्मी, रोयल साउदी एयर डिफेन्स, रोयल साउदी न्याभी, साउदी मिसाइल फोर्स, मेडिकल फोर्सलगायत सबैतर्फ आवेदन दिन सक्ने भएका छन् ।
वास्तवमा यो राजकुमार मोहोम्मद बिन सल्मानको ‘भिजन २०३०’ परियोजनाअन्तर्गतको कदम भएको बताइएको छ । जसमा उनले महिलाहरूलाई सबै क्षेत्रमा अघि बढाउन नियमहरू परिमार्जित गराउँदै लैजाने वचन दिएका थिए ।
यसका लागि महिलाहरूको उमेर २१ देखि ४० वर्षबीच हुन आवश्यक रहेको बताइएको छ । त्यस्तै उचाइ पनि १५५ सेन्टिमिटरभन्दा माथि हुनुपर्ने बताइएको छ ।
यसबाहेक निम्न कुराहरू हुनु आवश्यक छ,
सबै प्रक्रियामा पास भई सफा रेकर्ड हुनुपर्ने ।
शारीरिक रुपमा स्वस्थ हुनुपर्ने ।
सबैसँग स्वतन्त्र राष्ट्रिय परिचयपत्र पनि हुनुपर्ने ।
उच्च शिक्षा प्राप्त गरेको हुनुपर्ने ।
साउदीभन्दा बाहिरका पुरुषसँग विवाह गरेको हुनु हुँदैन ।
साउदी अरबमा महिलाहरूलाई धेरै काममा सीमित गरिएको छ- जस्तै रेस्टुरेन्ट, क्यासिअर, सपिङ मललगायतमा महिलाहरूलाई काम गर्न अनुमति छैन । यी काममा उनीहरू सम्बन्ध नभएका पुरुषहरूसँग सम्पर्कमा आउनुपर्ने हुनाले महिलालाई त्यस्ता काममा नराख्ने गरिएको हो ।
