भारतले चामल निर्यातमा प्रतिबन्ध लगाउनु अवसर कि चुनौती ?

अभियान दैनिकको टिप्पणीमा भारतले चामल निर्यातमा लगाएको प्रतिबन्ध नेपालका लागि अवसर भनेर लेखेको पाइयो । के कसैले प्रतिबन्ध लगाउनु पनि अवसर हुन्छ ? त्यसो त भारतले नेपालमाथि नाकाबन्दी लगाउँदा पनि नेपालका लागि आत्मनिर्भरताको अवसर भनेको पाइएकै थियो । जति नै अवसर भने पनि त्यस अवसरलाई उपयोग सरकार र निजीक्षेत्रले नगरेकाले खासमा त्यो अवसर हो भन्न सकिँदैन । अवसर त त्यस्तो हो जो देखापर्नासाथ फाइदा लिइहालिन्छ । जस्तै भारतले पाम आयल आयातमा कडाइ गर्दा नेपालले भन्साररहित सुविधाको अवसर पायो । त्यो अवसरको उपयोग गरेर व्यापारीले टन्न भारतमा पाम आयल निर्यात गरे र कुस्त कमाए पनि । अवसर भनेको यस्तो हो ।  हो, भारतले चामल निर्यातमा प्रतिबन्ध लगाएपछि व्यापारीका लागि भने अवसर बनेको छ । यही निहुँमा उनीहरूले चामलको भाउ बढाउन थालिसकेका छन् ।  गत सेप्टेम्बरमा बासमतीबाहेकको अन्य चामल निर्यातमा प्रतिबन्ध गरेसँगै नेपालमा हप्तादिनमै चामलको मूल्य बढेको थियो । त्यस बेला व्यवसायीहरूले प्रतिबोरा २ सय रुपैयाँदेखि ४ सय रुपैयाँसम्म बढाएका थिए । अहिले पनि त्यस्तै हुने आशंका छ ।  नेपालमा उत्पादन भएको धानले बजारमा माग धान्दैन । त्यसो हुँदा भारतबाट आयात गर्नुपर्ने बाध्यता छ । भारतले निर्यातमा प्रतिबन्ध गरेको अवस्थामा नेपालमा मूल्यमा प्रत्यक्ष असर पर्छ ।  सौरभ शाक्य कालिमाटी, काठमाडौं ।