काठमाडौं । सान्जेन जलविद्युत कम्पनी लिमिटेड नाफामा गएको छ । गत वर्षको यस अवधिसम्म १ करोड ३६ लाख रुपैयाँभन्दा बढी खुद नोक्सानीमा रहेको कम्पनीले यस वर्ष नोक्सानी सुधार्दै ३ करोड ५७ लाख रुपैयाँभन्दा बढी खुद नाफा गर्न सफल भएको हो ।
यस वर्ष कम्पनीले निर्माण सम्पन्न गरेको १४ दशमलव ८ मेगावाट क्षमताको माथिल्लो सान्जेन जलविद्युत आयोजनाबाट गत असोज २१ देखि व्यापारिक उत्पादन गर्न शुरु गरेसँगै नाफामा गएको हो ।
कम्पनीले निर्माण गरिरहेको ४२ दशमलव ५ मेगावाट क्षमताको सान्जेन जलविद्युुत आयोजनाबाट पनि आगामी चैत मसान्तसम्म व्यापारिक उत्पादन गर्ने लक्ष्य लिइएको छ ।
दोस्रो त्रैमाससम्म कम्पनीले विद्युत् विक्रीबाट ७ करोड १४ लाख रुपैयाँभन्दा बढी आम्दानी गरेको छ । हाल कम्पनीको चुक्ता पूँजी ३ अर्ब ६५ करोड रुपैयाँ छ । जगेडा कोष रकम भने २० करोड ५३ लाख रुपैयाँभन्दा बढी ऋणात्मक छ ।
दीर्घकालीन कर्जा ८ अर्ब ५१ करोड रुपैयाँभन्दा बढी रहेको कम्पनीको अल्पकालीन कर्जा भने २४ करोड रुपैयाँ छ । दोस्रो त्रैमाससम्म प्रतिशेयर आम्दानी १ रुपैयाँ ९६ पैसा रहेको कम्पनीको प्रतिशेयर नेटवर्थ ९४ रुपैयाँ ३७ पैसा छ ।
