सुन जत्तिकै महँगो आँप, खाने हो त ?

काठमाडौं । अहिले आँपको सिजन सिजन उत्कर्षमा छ । जात अनुसार फरक फरक मूल्यमा भने जस्ता आँप खान पाइन्छ । गएको हप्ता सिलगुडीमा दूर्लभ जातको आँप सुनकै मूल्यमा बिक्यो । पश्चिम बंगालको बिरभम जिल्लाका एक किसानको आफ्नो बगैंचाको हरेक आँप ३० हजार रुपयामा बेचे ।   यो भनेको ५ ग्राम २४ क्यारेट सुनको भाउ जत्तिकै थियो । सुनकै मूल्यमा बिकेको यो आँपको नाम मियाजाकी हो । बैजनी रातो खालको यो आँपको उद्गमस्थल चाँहि जापानको मियाजाकी प्रिफेक्चर हो । यो विश्वको सबैभन्दा महँगो आँप हो । विश्व बजारमा यो आँपको भाउ किलोकै २५ लाख रुपया छ । यो आँपको तौल ३५० ग्रामदेखि ९०० ग्रामसम्म हुन्छ ।  यो वर्ष भारतमा दूर्लभ खालको आँप मात्रै होइन । अन्य जातको आँप पनि उच्च मूल्यमा बिकिरहेका छन् । प्रतिकूल मौसमका कारण उत्पादन प्रभवित हुँदा देशभर नै आँप महँगो बनेको छ । महाराष्ट्र र कोन्कान क्षेत्रमा फल्ने अल्फोन्सो जातको आँपको उत्पादन घटेर आधामा झरेपछि मूल्य बढेको व्यापारीहरु बताउँछन् ।  गुजरातमा केसर जातको आँप पनि छोइ नसक्नु भएको छ । उत्पादन कम हुँदा निर्यात पनि प्रभावित बनेको छ । संयुक्त अरब इमिरेट्स, बेलायत, अमेरिका, कतार, कुवेत, ओमान, क्यानडा, सिंगापुर, बहराइन र भुटान भारतको मुख्य निर्यात बजार हुन् । तर यो वर्ष यी देशहरुमा जम्मा ३६ करोड रुपयाका मात्रै आँप निर्यात भए । फेब्रुअरीमा अल्फोन्सो आँपको फसल रामै्र थियो । तर अप्रिल र मेमा पाक्ने बेलासम्म आँप निकै कम थिए । मुख्य सिजन अघि एक दर्जन अल्फोन्सो आँपको मूल्य ५ हजार रुपया थियो । मियाजाकी आँपको बोटलाई विशेष हेरचाह चाहिन्छ ।  गएको वर्ष अप्रिलमा जापानमा दुई दाना मियाजाकी आँप ५ लाख येन (झन्डै ४ हजार डलर)मा विक्री भएको थियो । भारतमा पछिल्लो समय किसानहरु यो आँपको खेतितिर आकर्षित हुन थालेका छन् । यो आँप लटरम्मै फल्दैन । सूर्यको अन्डा भनेर चिनिने यो आँपको स्वाद पनि अति नै मिठो हुन्छ । विदेशमा यो आँपलाई विशेषगरी उपहारको रुपमा प्रयोग गर्ने गरेको पाइन्छ ।  एजेन्सी