काठमाडौं (अस) । गत आर्थिक वर्ष २०७७/७८ मा करीब ५३ लाख रुपैयाँ बराबरको परिरक्षित (प्रिजर्भ्ड) फलफूल आयात भएको छ । विगत १३ वर्षको तथ्यांकको विश्लेषण गरी हेर्दा यस अवधिमा परिरक्षित फलफूल आयातको औसत वार्षिक वृद्धिदर करीब १८ प्रतिशत रहेको छ । उक्त प्रवृत्तिलाई दृष्टिगत गर्दै परिरक्षित फलफूल उत्पादनमा सही रणनीति अवलम्बन गर्ने हो भने मुलुक केही वर्षभित्रै यस्तो फलफूलमा आत्मनिर्भर हुने निश्चित छ । यहाँ प्रस्तुत तथ्यांकले परिरक्षित फलफूल व्यवसायमा व्यावसायिक लगानीको उज्ज्वल सम्भावना रहेको पुष्टि हुन्छ । यसका लागि सरकारले उचित वातावरण सृजना गर्नु आवश्यक देखिन्छ ।
