नेपाल–भारत व्यापार सन्धि परिमार्जन गर्नुपर्नेमा विज्ञहरूको जोड

नेपाल–भारत व्यापार सहजीकरणको विषयमा छलफल

विराटनगर । मोरङ व्यापार संघले पटना, भारतका कस्टम्स कमिशनर पीके कट्यारसहित जोगबनी आएका भारतका भन्सार अधिकारीहरूसँग भेट गरी नेपाल–भारत व्यापार सहजीकरण विषयमा छलफल गरेको छ । पटनाका कस्टम्स कमिशनरद्वारा गठित कस्टम्स क्लियरेन्स फेसिलिटेशन कमिटी (सिसिएफसी)को सदस्यको रूपमा रहेको मोरङ व्यापार संघले सोमवार आइसिपी, जोगबनीमा आयोजित सिसिएफसी बैठकमा भाग लिँदै कमिशनर कट्यारसमक्ष संघको तर्फबाट राय सुझाव प्रस्तुत गरेको छ । संघका अध्यक्ष प्रकाश मुन्दडाको नेतृत्वमा गएको संघको टोली बैठकमा सहभागी भई कमिशनर कट्यारलाई मोरङ–सुनसरी आर्थिक कोरिडरलाई भारतले विशेष सहजीकरण गर्नुपर्नेमा जोड दिएको छ । नेपाल–भारत व्यापार, परिवहन र विभिन्न विषय वस्तु समेटेर संघले सुझाव प्रस्तुत गरेको छ । संघले प्रस्तुत गरेको उक्त सुझावमा विशेषगरी जोगबनी र विराटनगरका आइसिपीहरूमा निर्मित रेल्वे यार्ड तत्कालै सञ्चालनमा ल्याइनुपर्ने, रेलेवे ट्र्याकमार्फत नेपालका लागि जोगबनी स्टेशन आउने मालवस्तु हाललाई विराटनगर भन्सार कार्यालयबाटै जाँचपास गराउने व्यवस्था गरिनुपर्ने लगायत माग छन् । त्यसैगरी बमोजिम बथनाहमा निर्माणाधीन मिरगञ्ज पुलको वैकल्पिक पुलको निर्माण तत्कालै सम्पन्न गरी शीघ्ररूपमा सञ्चालनमा ल्याउनुपर्ने, भन्सार जाँचपासका पूर्वाधार थपेर व्यवस्थित गरिनुपर्ने, नेपाली कृषि उपजको निर्यातमा सहजीकरण हुनेगरी पूर्वाधार निर्माण गरिनुपर्ने विषय उल्लेख गरिएको छ । साथै भारतको दालखोलास्थित रेल्वे जक्सन पार गर्न मालवाहक सवारीसाधनका लागि फ्लाईओभर निर्माण गर्नुपर्ने, जोगबनीमा अध्यागमन सुविधा उपलब्ध गराउनुपर्ने, जोगबनी स्टेशनको सौन्दर्य बढाउँदै भारतका विभिन्न शहर पुग्ने रेल थप गर्नुपर्ने लगायत सुझाव प्रस्तुत गरिएको छ ।