राष्ट्रपति गणतन्त्रको प्रतीक संस्था हो । नेपालको संविधानले राष्ट्रपतिलाई निश्चित अधिकार र कर्तव्यसहित संविधानको संरक्षकको जिम्मेवारी दिएको छ । यो हाम्रो सङ्घीय लोकतान्त्रिक शासन व्यवस्थाको सम्मानित र मर्यादित संस्था हो । उक्त संस्थाप्रति नागरिकले देखाउने मर्यादित व्यवहारले नै व्यवस्थाप्रतिको निष्ठा झल्काउँछ । तर, राष्ट्रपतिको कार्यसम्पादन विषयमा अमर्यादित टीकाटिप्पणीको शृङ्खला हेर्दा कतै गणतन्त्रलाई बदनाम गराउने नियोजित षडयन्त्र त भइरहेको छैन भन्ने प्रश्न उठेको छ । गणतन्त्रको प्रतीक संस्थाप्रति अनास्था फैलाउन भएका सङ्गठित प्रयासहरू सतहमा आएका छन् । यस सन्दर्भमा राष्ट्रपति संस्थाको बदनाम गर्न उठाइएका केही सवालहरूको राजनीतिक सन्दर्भ र विरोध पछाडिको नियत केलाउने प्रयास गरिएको छ ।