माघ १८, चितवन । चालू आर्थिक वर्ष ०७८/७९ को ६ महीनामा चितवनमा १ हजार १८० ओटा नयांँ उद्योग दर्ता भएका छन् ।
चालू आवको पुससम्म सबै शीर्षकमा गरी घरेलु तथा साना उद्योग कार्यालय, चितवनमा उक्त संख्यामा उद्योग दर्ता भएका हुन् । कार्यालयमा उत्पादनमुलक उद्योग, कृषि तथा वनजन्य, उर्जामुलक, खनिजजन्य, निर्माणमुलक, पर्यटनमुलक र विज्ञान तथा सूचना प्रविधि शीर्षकमा उद्योगहरु दर्ता हुंँदै आएका छन् ।
कार्यालयमा नीजि र साझेदारी गरी लघु उद्यम, घरेलु उद्योग र साना उद्योग गरी तीन प्रकृतिका उद्योगहरु दर्ता हुने गर्दछ ।
सबैभन्दा बढी दर्ता कृषि उद्योग कम पर्यटनमुलक
चितवनमा दर्ता हुने उद्योगहरुमा सबैभन्दा बढी दर्ता कृषि तथा वनजन्य उद्योगमा भएका छन् भने सबैभन्दा कम पर्यटनमुलक उद्योगमा भएका छन् ।
जसअनुसार सो अवधिमा कृषि तथा वनजन्य उद्योगमा ८०४ ओटा उद्योग र पर्यटनमुलक उद्योगमा १२ ओटा मात्र उद्योग दर्ता भएका छन । यस्तै उत्पादनमुलक उद्योगमा १४६ ओटा र सेवामुलक उद्योग २१८ ओटा दर्ता भएका छन् भने अन्य शीर्षकमा कुनैपनि उद्योग दर्ता भएका छैनन् ।
कार्यालय प्रमुख यादवनाथ आचार्यले चितवन कृषिजन्य उद्योगमा अनुकुल स्थान र उर्बरभूमि भएकोले पनि यस शिर्षमा बढी उद्योग दर्ता हुने गरेको बताए ।
‘चितवन कृषिको लागि उर्बर भूमि हो, देशकै केन्द्रविन्दु पनि हो आचार्यले भने, साथै कृषिमा सरकारले सहुलियत तथा अनुदान कार्यक्रम ल्याएकोले पनि यो शीर्षकमा उद्योग दर्ता गर्ने बढेका हुन् । ’कृषि तथा वनजन्य उद्योग जुनसुकै उद्यमीले पनि गर्न सकिने र पछिल्लो समय आधुनिक कृषि प्रणाली तर्फ युवाहरुको आकर्षण बढेकोले पनि यी शीर्षकमा बढी उद्योग दर्ता हुने गरेको उनको भनाइ छ ।
अघिल्ला वर्षमा पर्यटनमुलक उद्योगमा आकर्षण बढेपनि कोरोनाका कारण पछिल्लो समय यो शीर्षकमा कम उद्योग दर्ता हुने गरेको उनले बताए । ‘पर्यटनमुलक उद्योगमा पर्यटनमुलक उद्योगहरु उपत्यका पर्यटन कार्यालयमा सहमति लिनुपर्ने असहज परिस्थिति पनि छ, उनले भने, यो शीर्षकमा पर्यटनमुलक र सेवामुलक अन्र्तगत वर्गीकरण पनि गरिएको छ ।’
डेढ करोड बढी राजस्व संकलन
चालू आवको ६ महीनामा दर्ता भएका उद्योगहरुबाट कार्यालयले डेढ करोडभन्दा बढी राजस्व संकलन गरेको छ । कार्यालयका अनुसार सबै शीर्षक गरी दर्ता भएका उद्योगहरुबाट १ करोड ५३ लाख ६९ हजार रुपैयाँ राजस्व संकलन भएको छ ।
जसअनुसार उत्पादनमुलक उद्योगमा २१ लाख २९ हजार कृषि तथा वनजन्य उद्योगबाट १ करोड ३ लाख ५१ हजार, पर्यटनमुलक उद्योगबाट १ लाख ५३ हजार रुपैंया र सेवामुलक उद्योगबाट २७ लाख ३५ हजार रुपैयाँ संकलन भएको कार्यालयले जानकारी दिएको छ ।
