काठमाडौं (अस) । एनएमबि बैंकले किसानलाई लक्षित गर्दै सिरहामा नयाँ काउन्टर सञ्चालन गरेको छ । बैंकले नरहा वडा नं ३ स्थित हिमालय सुगर मिल्स परिसरमा नयाँ काउन्टर सञ्चालनमा ल्याएको हो । यससँगै बैंकको काउन्टर संख्या ११ पुगेको छ । बैंकले किसान लक्षित शाखाहरूबाट किसानलाई सहुलियतपूर्ण कर्जा उपलब्ध गराउँदै आएको छ ।
हिमालय मिल्समा काउन्टर शुरू हुनुअघि पनि बैंकले गोलबजार शाखाबाट ४७ जना उखु किसानलाई सहुलियतपूर्ण कर्जा उपलब्ध गराइएको जानकारी दिएको छ । उखु किसानलाई सहज रूपमा कर्जा प्रवाह गर्ने उद्देश्यले रिलायन्स सुगर मिल्स र हिमालय सुगर मिल्ससँग सम्झौता समेत गरिसकिएको बैंकले बताएको छ । बैंकका प्रदेश प्रमुख कमल पोखरेलले प्रदेशमा सञ्चालित काउन्टरहरूबाट सेवा लिन किसान तथा सर्वसाधारणलाई आग्रह गरे ।