म्याग्दी (अस) । बेनी–जोमसोम सडकखण्ड दैनिक ९ घण्टा बन्द हुन थालेको छ । सडक स्तरोन्नति र विस्तार कार्य तीव्र बनाउन सडक खण्डको म्याग्दी र मुस्ताङको सिमानामा पर्ने बादरजुंगे भीर क्षेत्रमा काम भरहेको छ । सहज रूपमा काम सम्पन्न गर्न सवारीसाधन सञ्चालनमा वैशाख ९ देखि मसान्तसम्मका लागि दैनिक ९ घण्टा रोक लगाइएको बेनी–जोमसोम–कोरला सडक आयोजनाका सूचना अधिकारी अश्विनीकुमार यादवले जानकारी दिए । उनका अनुसार दैनिक रूपमा बिहान साढे ६ बजेदेखि ११ बजेसम्म र दिउँसो २ बजेदेखि साँझ साढे ६ बजेसम्म सडकमा सवारी आवागमन बन्द गरेर निर्माण गरिँदै छ । म्याग्दीको रघुगंगा गाउँपालिका–१ को तिप्ल्याङ क्षेत्र, म्याग्दीको अन्नपूर्ण गाउँपालिका ३ को बादरजुंगे भीर र मुस्ताङको थासाङ गाउँपालिका–४ को घाँसादेखि लेतेसम्मको सडक स्तरोन्नति भइरहेको उनले बताए ।
बेनी–जोमसोम सडकको काम चार प्याकेजमा भइरहेको छ । निर्माण कम्पनीले म्याग्दीको अन्नपूर्ण–३ र मुस्ताङको थासाङ–४ को सीमाक्षेत्रमा पर्ने बादरजुंगे भीरमा सडक चौडा पार्न रक कटिङको काम गरिरहेको छ । यस्तै, अन्य स्थानमा माटो फिलिङ, वाल लगाउने काम र नाली निर्माण गरिँदै छ । बेनी–जोमसोम–कोरला सडकको काम २०७४ सालदेखि शुरू भएको हो । करीब ६ अर्ब रुपैयाँ लागतको उक्त सडकमा अहिले ग्राभेलको काम भइरहेको छ । सडक आयोजनाका अनुसार हालसम्म बेनी–जोमसोम खण्डको भौतिक प्रगति ६० प्रतिशत र जोमसोम–कोरला खण्डको ८५ प्रतिशत भौतिक प्रगति भएको छ ।
