काठमाडौं । साताको पहिलो कारोबार दिन नेप्से परिसूचक १ दशमलव ३८ प्रतिशत बढेर बन्द भएको छ । अघिल्लो कारोबार दिनको तुलनामा नेप्से परिसूचक २८ दशमलव ३८ अंक बढेर २ हजार ७७ दशमलव ७६ विन्दुमा पुगेको हो ।
अघिल्लो कारोबार दिन भने नेप्से परिसूचक स्थिर बनेको थियो । आइतवार २ हजार ५० दशमलव ३६ विन्दुदेखि खुलेको बजार २ हजार ८५ दशमलव २३ विन्दुसम्म पुगेको हो भने २ हजार ४९ दशमलव ६९ विन्दुसम्म झरेको हो ।
यो दिन रू. ३ अर्ब ४ करोड २५ लाख बराबरको ८३ लाख ५२ हजार ५७६ कित्ता धितोपत्र कारोबार भएको छ । कुल कारोबारमा सर्वाधिक हिस्सा हिमालयन लाइफ इन्स्योरेन्सले ओगटेको छ । हिमालयन लाइफ इन्स्योरेन्सको सर्वाधिक रू. १८ करोड ६० लाखभन्दा बढीको धितोपत्र कारोबार भएको हो । सर्वाधिक रकमको कारोबार भएको दिन कम्पनीको शेयर मूल्य भने प्रतिकित्ता रू. १ ले बढेर अन्तिम मूल्य रू. ४९८ कायम भएको छ ।
बढेको बजारमा अपर तामाकोशी हाइड्रोपावरको शेयरमूल्य सर्वाधिक ६ दशमलव ६५ प्रतिशत घटेको छ । शतप्रतिशत हकप्रद शेयर विक्री गर्न असार २२ गते शुक्रवार अनुमति पाएको कम्पनीको आइतवार भने शेयर विक्री चाप बढी देखिएको हो ।
अपर तामाकोशीको शेयर मूल्य प्रतिकित्ता रू. ३१ दशमलव ५० ले घटेर अन्तिम मूल्य रू. ४४२ दशमलव ५० कायम भएको छ । यस दिन रावा ईनर्जी डेभलपमेन्ट र सिटी होटलको शेयर मूल्य उच्च दरमा बढेको छ । रावा ईनर्जीको शेयर मूल्य ९ दशमलव ९८ प्रतिशत अर्थात् प्रतिकित्ता रू. ३० दशमलव १० ले बढेर अन्तिम मूल्य रू. ३३१ दशमलव ७० कायम भएको हो । त्यस्तै सिटी होटलको शेयर मूल्य ९ दशमलव ५१ प्रतिशत वृद्धि भई प्रतिकित्ता रू. ७४१ दशमलव ५० पुगेको हो । यो दिन सिटी होटलको शेयर मूल्य प्रतिकित्ता रू. ६४ दशमलव ४० ले बढेको हो ।
नेप्सेका अनुसार आइतवारको कारोबारमा १६८ कम्पनीको धितोपत्र मूल्यमा वृद्धि भएको छ भने ५० कम्पनीको कम भएको छ । ६ कम्पनीको धितोपत्र मूल्य भने स्थिर रहेको छ । यो दिन सबै समूहगत परिसूचकहरू बढेका छन् । सर्वाधिक परिसूचक होटल तथा पर्यटन समूहको ४ दशमलव ६३ प्रतिशत वृद्धि भएको छ ।
त्यस्तै व्यापारिकको ४ दशमलव शून्य १ प्रतिशत, अन्यको २ दशमलव ७५ प्रतिशत, निर्जीवन बीमाको २ दशमलव ३५ प्रतिशत, लगानीको २ दशमलव १५ प्रतिशत, वित्तको २ दशमलव १० प्रतिशत, जीवन बीमाको १ दशमलव ८० प्रतिशत, उत्पादन तथा प्रशोधनको १ दशमलव ७९ प्रतिशत, विकास बैंकको १ दशमलव ५९ प्रतिशत, लघुवित्तको १ दशमलव शून्य ५ प्रतिशत, बैंकिङको शून्य दशमलव ६८ प्रतिशत, म्युचुअल फण्डको शून्य दशमलव ३८ प्रतिशत परिसूचक बढेको छ । यो दिन जलविद्युत समूहको परिसूचक भने स्थिर बनेको छ ।
आइतवार धितोपत्र दोस्रो बजारका कुल पूँजीकरण रू. ३० खर्ब ५२ अर्ब ६ करोड ८० लाख कायम भएको छ । अघिल्लो कारोबार दिन कुल बजार पूँजीकरण रू. ३० खर्ब ८ अर्ब ७२ करोड १४ लाख थियो । एकै दिन कुल बजार पूँजीकरण रू. ४३ अर्ब ३४ करोडभन्दा बढीले वृद्धि भएको हो ।
