जेठ ४, ताप्लेजुङ । ताप्लेजुङ उद्योग वाणिज्य संघले १७ थान अक्सिजन सिलिण्डर जिल्ला अस्पताललाई प्रदान गरेको छ ।
जिल्लामा कोरोना संक्रमण दर तीव्ररूपमा बढिरहेको र जिल्ला अस्पतालमा अक्सिजनको अभाव भइरहेको अवस्थामा उद्योग वाणिज्य संघले मंगलवार सिलिण्डर उपलब्ध गराएको हो ।
ताप्लेजुङ उद्योग वाणिज्य संघका वरिष्ठ उपाध्यक्ष दिनेश अधिकारीलगायत पदाधिकारी तथा सदस्यको उपस्थितिमा अक्सिजन सिलिण्डर जिल्ला अस्पतालका प्रमुख चिकित्सक सोनिङ लामालाई हस्तान्तरण गरिएको हो । वाणिज्य संघले यसअघि गएको शुक्रवार आठ थान अक्सिजन सिलिण्डर उपलब्ध गराएको थियो ।
प्रतिनिधिसभा सदस्य तथा पूर्वमन्त्री योगेशकुमार भट्टराई, प्रदेश १ का आर्थिक मामिला तथा योजनामन्त्री टंक आङ्बुहाङसहित विभिन्न उद्योगी, व्यापारीलगायत दाताको सहयोगबाट दुईपटक गरेर २५ थान अक्सिजन सिलिण्डर जिल्ला अस्पताललाई उपलब्ध गराएको वाणिज्य संघका वरिष्ठ उपाध्यक्ष अधिकारीले बताए ।
जिल्ला अस्पताललाई उपलब्ध गराएको अक्सिजन सिलिण्डरले कोभिड–१९ संक्रमित भएका बिरामीको उपचारमा सहयोग पुग्ने विश्वास वाणिज्य संघले लिएको छ । रासस