भोजपुर । भोजपुरमा सुन्तला उत्पादन बढेको छ । यस वर्ष जिल्लामा ६ हजार २९३ मेट्रिकटन सुन्तला उत्पादन भएको छ । गतवर्षको तुलनामा यस वर्ष ८५३ मेट्रिकटन बढी सुन्तला उत्पादन भएको कृषि ज्ञान केन्द्र भोजपुरले जानकारी दिएको छ । गतवर्ष ५ हजार ४४० मेट्रिकटन सुन्तला उत्पादन भएको केन्द्रको तथ्यां्रक छ । सबै स्थानीय तहमा सुन्तला उत्पादन हुने भए पनि विशेषगरी टेम्केमैयुङ गाउँपालिका, भोजपुर नगरपालिका, षडानन्द नगरपालिका, हतुवागढी गाउँपालिका र रामप्रसादराई गाउँपालिकामा सुन्तलाको उत्पादन तुलनात्मक रूपमा बढी हुन्छ ।
अन्य बालीको तुलनामा सुन्तलाखेतीबाट राम्रो आम्दानी हुने तथा घरैबाट विक्री हुने भएकाले यसतर्फ कृषकको आकर्षण बढेको केन्द्रका सूचना अधिकारी विश्वास अङगाईंले बताए । सुन्तला प्रतिकेजी सय रुपैयाँदेखि १२० रुपैयाँसम्ममा विक्री हुने यहाँका किसान बताउँछन् । यहाँको सुन्तला स्थानीय बजारसँगै धरान, विराटनगर, काठमाडौंसम्म पुग्ने भोजपुर नगरपालिका–५ बोखिमका कृषक धनबहादुर थापाले बताए । पहिला डोकोमा बोकेर बजारमा लैजानुपर्ने बाध्यता थियो । तर अहिले व्यापारीहरू घरमै आएर बोटबाटै टिपेर लाने गरेको उनको भनाइ छ । भोजपुरमा ९२० हेक्टर क्षेत्रफमा सुन्तलाखेती गरिँदै आएको छ ।
