पुस २३, काठमाडौं । पुस मसान्त नजिकिन लाग्दा नेपाल स्टक एक्सचेञ्जमा सूचीकृत १८ ओटा निर्जीवन बीमा कम्पनीमध्ये दुई ओटा कम्पनीले मात्र लाभांश वितरण गर्ने घोषणा गरेका छन् ।
प्रिमियर इन्स्योरेन्स कम्पनी र हिमालयन जनरल इन्स्योरेन्स कम्पनीले गत आव २०७७/७८ को मुनाफाबाट यस वर्षका लागि लाभांश वितरण गर्ने घोषणा गरेका हुन् ।
प्रिमियर इन्स्योरेन्स कम्पनीले गत आवको मुनाफाबाट यसवर्ष शेयरधनीलाई कुल १५ प्रतिशत लाभांश वितरण गर्ने प्रस्ताव गरेको छ । कम्पनीले ७ दशमलव ५ प्रतिशत बोनस शेयर र ७ दशमलव ५ प्रतिशत नगद लाभांश कर सहित गरेर कुल १५ प्रतिशत लाभांश वितरण गर्ने प्रस्ताव गरेको हो ।
कम्पनीको मंसिर ३ गते बसेको सञ्चालक समितिको बैठकले उक्त लाभांश वितरण गर्ने प्रस्ताव गरेको थियो । कम्पनीले अघिल्लो आवको मुनाफाबाट गत वर्ष शेयरधनीलाई ११ दशमलव शून्य ५ प्रतिशत नगद लाभांश वितरण गरेको थियो ।
त्यसैगरी, हिमालयन जनरल इन्स्योरेन्स कम्पनीले ६ दशमलव ६५ प्रतिशत बोनस शेयर र शून्य दशलमव ३५ प्रतिशत नगद लाभांश कर प्रयोजनको लागि वितरण गर्ने प्रस्ताव गरेको हो ।
कम्पनीको पुस २१ गते बसेको सञ्चालक समितिको बैठकले उक्त लाभांश वितरण गर्ने प्रस्ताव गरेको थियो । कम्पनीले अघिल्लो आवको मुनाफाबाट गत वर्ष शेयरधनीलाई ३ प्रतिशत बोनस शेयर र ३ दशमलव ७५ प्रतिशत नगद लाभांश वितरण गरेको थियो । यसरी हेर्दा गत वर्ष भन्दा यस वर्ष बोनस शेयर बढेको छ ।
यी दुवै कम्पनीले प्रस्ताव गरेको लाभांश बीमा समितिबाट स्वीकृति पाएपछि र कम्पनीको आगामी साधारण सभाबाट पारित भएपछि शेयरधनीले पाउनेछन् । हलसम्ममा यी दुवै कम्पनीले साधारण सभा बोलाएका छैनन् । सानिमा जनरल इन्स्योरेन्स कम्पनीले भने पुस ३० गते साधारण सभा आयोजना गरेको छ ।
सभा पुस ३० गते स्मार्ट क्याफे ब्याक्वेट धुम्बाराही चोक काठमाडौंमा साधारण सभा आयोजना गरेको छ । गत आवको मुनाफा कुनै पनि लाभांश वितरण गर्ने प्रस्ताव गरेको छैन ।
सभाले आव २०७७/७८ को वार्षिक प्रतिवेदन छलफल गरी पारित गर्ने र आव २०७८/७९ को लागि लेखापरीक्षकको नियुक्ती गर्ने प्रस्ताव पारित गर्नेछ ।
कम्पनी ऐन अनुसार आर्थिक शुरु भएको ६ महीना भित्र अर्थात् पुस मसान्त सम्ममा साधारण सभा गरिसक्नु पर्ने व्यवस्था रहेको छ । समयमै साधारण सभा गर्ने सानिमा जनरल इन्स्योरेन्स कम्पनी मात्र देखिन्छ ।
बीमा समितिले आव २०७४/७५ देखि कम्पनीहरुलाई अनिवार्य रुपमा एनएफआरएस प्रणाली अनुसार वित्तीय विवरण तयार पार्न निर्देशन दिएको थियो । सोही नयाँ स्वरुपमा वित्तीय विवरण तयार पार्दा समय लाग्ने भएकाले साधारण सभा गर्न ढिलाई भएको हो ।
एनएफआरएस प्रणाली लागू भएसँगै राष्ट्रिय बीमा कम्पनीबाहेक बाँकी निर्जीवन बीमा कम्पनीले अघिल्लो आवको साधारण सभा सम्पन्न गरिसकेका छन् ।