काठमाडौं । मेरो माइक्रोफाइनान्स लघुवित्त वित्तीय संस्था लिमिटेडले चालू आर्थिक वर्षको दोस्रो त्रैमाससम्म रू. ६ करोड ७७ लाखभन्दा बढी खुद नाफा गरेको छ । गत वर्षको यसै अवधिसम्मको तुलनामा कम्पनीको खुद नाफा करिब ७७ प्रतिशत कम भएको हो । गत वर्ष यस अवधिसम्म कम्पनीले रू. २९ करोड ४२ लाखभन्दा बढी खुद नाफा गरेको थियो ।
यस वर्ष कम्पनीको सञ्चालन नाफा ७७ दशमलव ४४ प्रतिशत कम भएको छ । गत वर्ष रू. ४२ करोडभन्दा बढी सञ्चालन नाफा गरेको कम्पनीले यस वर्ष रू. ९ करोड ४८ लाखभन्दा बढी मात्र यो नाफा गरेको हो । दोस्रो त्रैमाससम्म कम्पनीको वितरणयोग्य नाफा भने रू. ४ करोड ६६ लाखभन्दा बढी रहेको छ ।
हाल रू. १ अर्ब २० करोड चुक्तापूँजी रहेको कम्पनीको रिटेन्ड अर्निङ रू. ३६ करोड ४९ लाखभन्दा बढी र जगेडा कोष रकम रू. ४८ करोड ९३ लाखभन्दा बढी रहेको छ । कम्पनीले दोस्रो त्रैमाससम्म गत वर्षभन्दा ५ दशमलव २३ प्रतिशत बढी रू. ३ अर्ब ५९ करोड ७९ लाख निक्षेप संकलन गरेको छ भने ८ प्रतिशत कम रू. १ अर्ब ५० करोड कर्जा प्रवाह गरेको छ ।
कर्जा सापटी भने गत वर्षभन्दा १४ दशमलव ४५ प्रतिशत कम रू. ८ अर्ब ८९ करोड रहेको छ । गत वर्ष ३ दशमलव ५५ प्रतिशत रहेको निष्क्रिय कर्जा यस वर्ष बढेर ४ दशमलव ९६ प्रतिशत पुगेको छ । कम्पनीको वार्षिक प्रतिशेयर आम्दानी रू. ११ दशमलव ३० र प्रतिशेयर नेटवर्थ रू. १७१ दशमलव १९ रहेको छ ।
