जेठ २६, काठमाडौं । धितोपत्र दोस्रो बजारमा सीईडीबी हाइड्रोपावर डेभलपमेन्ट कम्पनी लिमिटेडको बुधवारदेखि शेयर कारोबार शुरु भएको छ ।
मंगलवार कुल ८३ लाख ९४ हजार १०० कित्ता शेयर नेप्सेमा सूचीकृत गराएको कम्पनीको सीएचडीसी स्टक संकेतबाट शेयर कारोबार शुरु भएको हो । कम्पनीले रू. ८३ करोड ९४ लाख १० हजार चुक्तापूँजी बराबरको उक्त शेयर सूचीकृत गराएको हो ।
कम्पनीको पहिलो कारोबारका लागि नेप्सेले प्रतिकित्ता रू. १३८ दशमलव ७९ देखि रू. ४१६ दशमलव ३७ सम्मको मूल्य रेञ्ज तोकेको थियो । नेप्सेले तोकेको अधिकतम मूल्यमै प्रि - ओपनिङ सेसनमा कारोबार भएसँगै सोहि मूल्यमा नियमित सेसनको कारोबार शुरु भएको हो ।
पहिलो कारोबार दिन कम्पनीको शेयर खरीद चाप सबैभन्दा बढी रहेको छ । कारोबारको २२ मिनेटको अवधिसम्ममा कम्पनीको ५ लाख ९० हजार ३५६ कित्ता शेयर खरीद माग रहेको छ भने विक्रीकर्ता देखिएका छैनन् ।
यस अवधिसम्म कम्पनीको रू. ३३ हजार ७६० बराबरको ८० कित्ता शेयर कारोबार भएको छ । यो कारोबार रू. ४१६, रू.४२४, रू.४३२ र रू.४४० सम्मको मूल्यमा भएको हो ।
कम्पनीले सर्वसाधारणका लागि गत वैशाख ३१ गते आईपीओ बाँडफाँट गरेको थियो ।
