जेठ १५, काठमाडौं ।ग्लोबल आइएमई म्युचुअल फण्ड अन्तर्गत सञ्चालित ग्लोबल आइएमई समुन्नत योजना–१ ले वैशाख मसान्तसम्मको खुद सम्पत्ति मूल्य विवरण सार्वजनिक गरेको छ । उक्त वित्तीय विवरणअनुसार फण्डले वैशाख मसान्त सम्ममा रू. २ करोड १० लाख नाफा कमाएको छ । यो नाफा चैत मसान्तसम्मको तुलनामा ६४ प्रतिशतले घटेको हो । फण्डले चैत मसान्तसम्ममा रू. ५ करोड ८७ लाख नाफा कमाएको थियो ।
वैशाख मसान्तसम्ममा फण्डको आम्दानी घटेकाले नाफा घटेको हो । त्यसैगरी फण्डको खर्चमा वृद्धि भएकाले पनि नाफा घटेको देखिन्छ । चैत मसान्तसम्ममा फण्डको जम्मा खर्च रू. २ करोड ५७ लाख रहेकोमा वैशाख मसान्त सम्ममा बढेर रू. २ करोड ७६ लाख पुगेको हो ।
चैत मसान्त सम्ममा फण्डले जम्मा रू. ८ करोड ४४ लाख आम्दानी गरेकोमा वैशाख मसान्तसम्ममा रू. ४ करोड ८६ लाखमा सीमित भएको हो । त्यसैगरी फण्डको प्रतिइकाइ सम्पत्ति मूल्य (न्याभ) पनि चैत महीनाको तुलनामा वैशाख महीनामा घटेको छ । चैत मसान्तसम्ममा फण्डको न्याभ रू. ११ दशमलव ७४ रहेकोमा वैशाख मसान्तसम्ममा रू. ११ दशमलव ३७ कायम भएको हो ।
त्यसैगरी फण्डको सूचीकृत धितोपत्रमा गरेको लगानी पनि घटेको छ । चैत मसान्त सम्ममा फण्डले सूचीकृत धितोपत्रमा रू. १ अर्ब २ करोड रहेकोमा वैशाख मसान्त सम्ममा रू. ९८ करोड ५८ लाखमा सीमित भएको हो ।
