माघ २७, नयाँदिल्ली । मौद्रिक नीति समीक्षापछि भारतीय रिजर्भ बैंक( आरबीआई) का गभर्नर शक्तिकान्त दासले कोरोना महामारीको अवसर भारतीय अर्थतन्त्रमा अव नभएको बताएका छन् ।
केन्द्रीय बैंकले चालू वित्त वर्षमा भारतको कुल आर्थिक वृद्धि दर ९ दशमलव २ रहने अनुमान लगाएको छ । जबकि वित्त वर्ष सन् २०२२/ ०२३ मा कुल आर्थिक वृद्धि दर ७ दशमलव ८ प्रतिशत वृद्धि हुने अनुमान गरिएको छ ।
भारतीय अर्थव्यवस्थामा तिव्र गति ल्याउन केन्द्रीय बैंकले मौद्रिक नीतिको बैठकमा ब्याजदरमा कुनै परिवर्तन नगर्ने फैसला गरेको छ । आरबीआईका गभर्नर दासले हाल अर्थतन्त्रको तिब्र विकास नै आरबीआईको प्रमुख प्राथमिकता रहेको बताए ।
साथै उनले हालको अवस्थामा महंगी चिन्ताको विषय नभएको भन्दै केन्द्रीय बैंकले रिपो रेट र रिभर्स रिपो रेटमा कुनै पनि परिवर्तन नगर्ने बताए ।
चालू वित्त वर्षका लागि बजेट घोषणापछि बसेको मौद्रिक नीतिको बैठकले रिपो रेट ४ प्रतिशत नै कायम राखी राख्ने निर्णय गरेको छ । हाल भारतमा रिपो रेट ४ प्रतिशत र रिभर्स रिपो रेट ३ दशमलव ३५ प्रतिशत रहेको छ ।
भारतमा चालू वित्त वर्षमा महंगी वृद्धि दर ५ दशमलव ३ प्रतिशत हुने अनुमान छ । तर केन्द्रीय बैंकले चालू वित्त वर्षको अन्तिम त्रैमासमा भने महंगी वृद्धि दर ४ प्रतिशत हुन सक्ने आकलन गरेको छ ।
कोरोना महामारीलाई ध्यानमा राख्दै आरबीआईले लगातार १० औं पटक पनि ब्याजदरमा परिवर्तन नगरेको हो । यो भन्दा पहिले आरबीआईले सन् २०२० को मे २२ मा ब्याजदरमा परिवर्तन गरेको थियो । एजेन्सी
