चीनबाट थप १० लाख डोज खोप आउँदै, बिहीबार वाइड बडी बेइजिङ उड्ने

थप खोप ल्याउन निगमको वाइड बडी जहाज पेचिङ जादैं

असार १९, काठमाडौं । राष्ट्रिय ध्वजाबाहक नेपाल वायुसेवा निगम (नेपाल एयरलाइन्स) ले चीनको राजधानी पेचिङबाट कोरोना भाइरसविरुद्धको थप खोप ल्याउने भएको छ ।  सरकारको निर्णयअनुरुप चीनबाट खोप ल्याउनका लागि यही असार २४ गते (जुलाई ८ तारिख) वाइड बडी ए३३० जहाज पठाउने तयारी गरिएको नेपाल वायुसेवा निगमले जानकारी दिएको छ । निगमका महाप्रबन्धक डिमप्रकाश पौडलले चीनबाट खोप ल्याउनका लागि वाइड बडी जहाज पेचिङ पठाउने तयारी गरिएको बताए । खोप लिएर निगमको जहाज भोलिपल्ट काठमाडौं फर्किनेछ ।  महाप्रबन्धक पौडेलले भने, ‘चीनबाट खोप ल्याउन निगमलाई सरकारको निर्देशन भएबमोजिम तयारी गरिएको छ, खोपको मात्रा तथा उक्त खोप अनुदानको हो या खरीदको भन्ने अहिले खुलिसकेको छैन हामीले आफ्नो तयारी थालिसकेका छौँ ।’ बुझिएअनुसार पहिलो उडानमा १० लाख मात्रा खोप ल्याउने गरी तयारीमा रहन निगमलाई निर्देशन दिइएको छ । रासस