प्रदेश १ को राजधानीसमेत रहेको विराटनगरमा ठूलो संख्यामा सिटी सफारीले दैनिक मुख्य तथा भित्री सडक जाम गर्नुका साथै दुर्घटना बढ्न थालेपछि चेकजाँचमा कडाइ गरेको प्रहरीले जनाएको छ।...
विराटनगर (अस) । महानगरभित्र सवारीको चाप कम गराउन विराटनगर महानगरपालिकाले महानगरमा दर्ता भएका बाहेकका सिटी सफारी (अटो रिक्सा) प्रवेशमा रोक लगाएको छ । तर छिमेकी गाउँपालिकाका सिटी सफारी चालकले भने प्रवेश पाउनुपर्ने माग गरेका छन् ।
महानगरपालिकाले सवारी जाम बढेको भन्दै त्यसको न्यूनीकरणका लागि छिमेकी पालिकाबाट यात्रु बोकेर विराटनगर आउने सिटी सफारीलाई सोमवारदेखि प्रतिबन्ध लगाएको हो । महानगरपालिकाले यातायात व्यवस्था कार्यालयको इजाजतपत्र र स्थायी बसोवासको आधार मानेर रूट पर्मिट तय गर्ने निर्णय गरेको छ ।
महानगरपालिकाका प्रमुख प्रशासकीय अधिकृत उमेश बस्नेतले पहिले महानगर पालिकाभित्रका सिटी सफारीलाई दर्ता गर्ने प्रक्रिया शुरू गरिएको र यो सकिएपछि जारी सूचना अनुसार नै अन्य गाउँपालिकामा दर्ता भएर आउने सिटी सफारीलाई प्रवेश गर्न रोकिने बताए । विराटनगर महानगरपालिकामा मात्रै ४ हजार ४०० सिटी सफारी रहेको अनुमान छ ।
यसैबीच, महानगरपालिकाको यस्तो निर्णयका विरुद्ध मोरङका कटहरी र जहदाका सिटी सफारी चालक आन्दोलित भएका छन् । उनीहरूले आइतवार विराटनगरमा पत्रकार सम्मेलन गरी विराटनगर महानगरपालिकाले उक्त निर्णय तत्काल सच्याउनुपर्ने माग गरेका छन् । सिटी सफारी चालक संघका अध्यक्ष एवं कटहरी–जहदा सिटी सफारी चालक संयुक्त संघर्ष समितिका संयोजक अध्यक्ष काशीराम राजवंशीले यो निर्णय फिर्ता हुनुपर्ने बताए ।
महानगरपालिकामा प्रवेश गर्ने सिटी सफारीलाई निषेध गर्ने निर्णयले रोजगारी खोसिएको उनीहरूको गुनासो छ । यसअघिसम्म विराटनगर महानगरपालिकाभित्र प्रवेश गर्ने सिटी सफारीले दैनिक १० रुपैयाँ सवारी कर बुझाउँदै आएका थिए । महानगरपालिकाले हाटखोला, बरगाछी र केशलियामा ढाट राखेर छिमेकी पालिकाबाट प्रवेश गर्ने सिटी सफारीका चालकसँग १० रुपैयाँ कर असुल्दै आएको संघर्ष समितिका सह–संयोजक दीपक मण्डल राजवंशीले बताए ।
