१ अर्ब नाघ्यो टिकटकका सक्रिय प्रयोगकर्ताको संख्या

असोज १३, पेचिङ (चीन) । चिनियाँ शर्ट भिडियो शेयरिङ एप टिकटकका मासिक सक्रिय प्रयोगकर्ता १ अर्ब नाघेका छन् ।   सन् २०१८ को जनवरीमा टिकटकका ५ करोड ४० लाख सक्रिय प्रयोगकर्ता थिए । गत वर्ष पहिलो पटक टिकटकले फेसबुकलाई उछिनेर सूचीको शीर्ष स्थानमा उक्लिएको छ । सन् २०१९ मा सर्वाधिक डाउनलोड हुने एपहरूको सूचीमा भने टिकटक चौथो स्थानमा थियो ।  बजारमा स्न्यापच्याट, फेसबुक, इन्स्टाग्राम, पिनट्रेस्ट, युट्युवजस्ता कम्पनीहरु टिकटकजस्तै फिचर उपलब्ध गराएर प्रयोगकर्ता तान्ने होडमा छन् ।  ‘मासिक रुपमा विश्वका १ अर्बभन्दा बढी प्रयोगकर्ता अब टिकटकमा जोडिएका छन’, कम्पनीलेले ब्लगमा भनेको छ, ‘जहाँबाट उनीहरूले सिक्ने, हाँस्ने र केही नयाँ जान्ने अवसर पाएका छन् । हामी यति धेरै प्रयोगकर्ताको घर, साना- साना व्यवसायीको बिजनेश प्लेटफर्म, सेलिब्रेटीको आफ्ना फलोअरसँग भेट्ने माध्यम हुन पाउँदा खुशी छौं ।’ टिकटक अहिले विश्वमा सबैभन्दा डाउनलोड गरिने एपहरुको सूचीमा एक नम्बरमा छ । अहिलेसम्म विश्वव्यापीरुपमा यो एप २ अर्बपटक डाउनलोड गरिएको छ । एप ट्रेस नामक वेबसाइटका अनुसार टिकटक एप अहिले विश्वका १४१ ओटाभन्दा बढी देशमा उपलब्ध छ । यीमध्ये १३५ ओटा देशमा यो सर्वाधिक लोकप्रिय एपका रुपमा रहेको छ । सामाजिक सञ्जालमा गरिने पोष्टमा सबैभन्दा बढी इंगेजमेन्ट हुने टिकटकमा नै हो । अमेरिकाका पूर्व राष्ट्रपति डोनल्ड ट्रम्पले यसमाथि अमेरिकामा प्रतिबन्ध लगाउन खोजेको भएपनि विश्वभर यसको लोकप्रियता निरन्तर चुलिरहेको छ । फिल्मका गीत र डाइलगमा लिपसिंक गरेर छोटो भिडियो पोष्ट गर्ने एपका रुपमा शुरुमा चिनिए पनि पछिल्ला दिनमा बजार प्रवर्द्धन  तथा व्यापार विस्तारमा पनि  यो बहुआयामिक बन्दै गइरहेको छ ।एजेन्सीहरु