निर्माण व्यवसायीलाई मन्त्री झाँक्रीको जवाफः 'मूल्य वृद्धि हाम्रो नियन्त्रणमा छैन, होली डे को कुरा नगरौ'

फागुन २७, काठमाडौं । व्यवसायीहरूले मूल्य वृद्धिका कारण 'निर्माण होली डे'को अवस्था आएको बताएपछि शहरी विकास मन्त्री राम कुमारी झाँक्रीले केही कुरामा सम्झौता गरेर जान व्यवसायीलाई आग्रह गरेकी छिन् । निर्माण व्यवसायीको १२ औं अधिवेशनलाई सम्बोधन गर्दै मन्त्री झाँक्रीले मूल्यवृद्धि सरकारको नियन्त्रणमा नरहेकोले भन्दै नियन्त्रण भन्दा बाहिरका माग राखेर होली डे मनाउने कुरा गर्न नहुने बताएकी हुन् । ‘हामीसँग असमित समय छैन । त्यसकारणले आज शुरु भएको आयोजना समयमै सक्ने हुनुपर्यो । मूल्यवृद्धिप्रति हामी संवेदनसिल छौं तर हाम्रो नियन्त्रणमा छैन ।’ झाँक्रीले भनिन्, ‘त्यसकारणले व्यवसायीले कन्स्ट्रक्सन होली डे होइन, कुनै न कुनै कुरामा कम्प्रोमाइज गरेर समयमा काम सम्पन्न गर्ने कुराको प्रतिबद्धता गर्नुपर्छ ।’ अन्तरराष्ट्रिय कारणले आइपरेका समस्या व्यवसायीले बुझ्नुपर्ने मन्त्री झाँक्रीको भनाई थियो । सामुहिक हिसाबले काम गर्नका लागि धरौटी परिचालन लगायतमा संशोधन गरिएको भन्दै केही कुरामा सम्झौता गर्नपनि मन्त्री झाक्रीले व्यवसायीहरूलाई आग्रह गरिन् । खरीद ऐनको ११औं संशोधनले निर्माण व्यवसायी उत्साहित, सरकारले सार्वजनिक खरीद नियमावलीको ११औं संशोधन गरेपछि निर्माण व्यवसायी उत्साहित देखिएका छन् । निर्माण व्यवसायीको १२ औं अधिवेसनको पूर्वसन्ध्यामा सरकारले खरीद नियमावलीको ११ औं संशोधन गरेर ठूलो उपहार दिएको निर्माण व्यवसायी महासंघका अध्यक्ष रवि सिंहले बताए । ‘सार्वजनिक खरीद नियमावली हिजोको मन्त्रीपरिषदको बैठकले ११ औं संशोधन गरेको खबरबाट हामी खुसी छौं’ अध्यक्ष सिंहले खुसी हुँदै भने, ‘११औं संशोधनले निर्माण क्षेत्रमा रहेको विकृति हटाउने छ।’ यसअघि बिहीवार बसेको मन्त्रीपरिषदको बैठकले सार्वजनिक खरीद नियमावलीको ११औं संशोधन गर्दै ३ अर्ब रुपैयाँसम्म लागत पर्ने ठेक्का नेपाली निर्माण व्यवसायीले नै लिन पाउने व्यवस्था गरेको थियो ।  यसअघि १ अर्ब रुपैयाँ लागतसम्मका ठेक्का मात्रै नेपाली निर्माण व्यवसायीले पाउने व्यवस्था रहेको थियो । सो भन्दा माथिका ठेक्का विदेशी कम्पनीसँग जोइन्ट भेन्चरमा मात्रै गर्न पाउने व्यवस्था रहेको थियो । निर्माण व्यवसायी महासंघका बरिष्ठ उपाध्यक्ष निकोलस पाण्डले नियमावलीको ११औं संशोधनबाट निर्माण व्यवसायीमा खुसी छाएको बताए । ‘कोभिडको कारणले निर्माण उद्योग अहिले कोमामा पुगेको छ’ पाण्डेले भने, ‘हिजो सरकारले ११औं संशोधन गरेपछि हामी उत्साहित छौं ।’ मूल्यवृद्धिले कन्स्ट्रक्सनमा होली डे को स्थिति यसैबीच निर्माण व्यवसायीले आफूहरुको व्यवसाय मूल्य वृद्धिको मारमा परेको गुनासो गरेका छन् । अध्यक्ष सिंहले पछिल्लो समय डिजेलको मूल्य ६० प्रतिशतले र फलामको मूल्य सतप्रतिशतले बढेको भन्दै त्यसको मारमा निर्माण व्यवसायी परेको गुनासो गरे ।  ‘निर्माण क्षेत्र चर्को मूल्यवृद्धिको मारमा परेको छ’ उनले भने, ‘इन्धनको मूल्य ६० प्रतिशतले बढेको छ । फलामको मूल्य सतप्रतिशत बढेको छ भने बिटुमिनको मूल्य ५७ रुपैयाँ प्रतिकिलोबाट ११५ रुपैयाँ पुगेको छ।’  मूल्य वृद्धि निरन्तर भएमा विकास निर्माणका काम गर्न नसकिने अध्यक्ष सिंहको भनाई छ । ‘मूल्य वृद्धिले विकास निर्माणका काम गर्न नसक्ने स्थिति आएको छ ।’ सिंहले भने, ‘यसले कन्स्ट्रक्सन होली डे मनाउने स्थिति आउन सक्छ ।’  महासंघका बरिष्ठ उपाध्यक्ष पाण्डले इन्धनमा भएको मूल्यवृििद्धले निर्माण व्यवसायी प्रताडित बनेको गुनासो गरे । ‘इन्धनको मूल्य वृद्धिले निर्माण व्यवसाय प्रताडित बनेको छ । यसले आयोजनाको लागत बढ्ने निश्चित छ  ।’ पाण्डले भने, ‘मूल्य वृद्धिले थेगी नसक्ने अवस्था आएको छ ।’