काठमाडौं । नेपाल भारत सीमाबाट हुने अवैध निकासी र पैठारीलाई रोक्न मोरङको पूर्वी दक्षिण क्षेत्र सीमामा सशस्त्र प्रहरी बलको बोर्डर आउट पोस्ट (बीओपी)ले नवनिर्मित भवनबाट आफ्नो सेवा शुरू गरेको छ । रंगेली नगरपालिकाको सहयोगमा धनापट्टीस्थित सशस्त्र प्रहरीको बीओपीको नवनिर्मित भवन मंगलवार उद्घाटन गरिएपछि सेवा शुरू भएको हो ।
नगरपालिका प्रमुख दिलीप बगडिया र सशस्त्र प्रहरी बल नेपाल नं. १ वराह वाहिनीका नायब महानिरीक्षक वंशीराज दाहालले संयुक्त रूपमा भवनको उद्घाटन गरेपछि बीओपीले बोर्डरको सुरक्षा र सेवा दिन थालेको हो ।
यसअघि सुनवर्षीको सिक्टी र रतुवामाई नगरपालिकाको मिर्चाडाँगीमा बीओपी स्थापना गरिएको थियो । थपिएका तीन बीओपीमध्ये रंगेलीको भवन पहिला सम्पन्न भएको हो । रंगेली नगरपालिको १६ लाख रुपैयाँ सहयोग र सशस्त्र प्रहरीको श्रमदानमा भवन निर्माण भएको सशस्त्र प्रहरी रंगेली बीओपीका इन्स्पेक्टर कमल अधिकारीले जानकारी दिए ।
यसअघि मोरङमा सशस्त्र प्रहरीको सीमाक्षेत्रमा आठओटा बीओपीले सीमा क्षेत्र र चोरी तस्करी रोक्दै आएको छ । सिक्टी बीओपीका लागि सुनवर्षी नगरपालिकाले १० कट्ठा ऐलानी जग्गाका साथै भौतिक संरचना निर्माणका लागि ५ लाख रुपैयाँ बजेटसमेत उपलब्ध गराएको छ । यस्तै, मिर्चाडाँगीमा रतुवामाई नगरपालिकाले १० लाखको लाागतमा भौतिक संरचना निर्माण गरिरहेको सशस्त्र प्रहरी बल नेपाल नम्बर ३ कंकालनी गणका गणपति एसपी तीर्थ पौडेलले बताए ।
सशस्त्र प्रहरीका डीआईजी दाहालले सरकारले नेपाल भारत सीमा क्षेत्रमा ११४ ओटा थपेर २२१ ओटा बीओपी पुर्याउने लक्ष्यअन्तर्गत मोरङमा तीनओटा बीओपी थपिएको बताए । योसँगै ६३ किलोमिटर नेपाल–भारत सीमा भएको मोरङमा बीओपीको संख्या ११ पुगेको छ । सरकारले अब दोस्रो चरणमा नेपाल–भारत सीमा क्षेत्रमा बीओपीको संख्या थपेर ५०० पु¥याउने लक्ष्य लिएको छ । त्यसका लागि जग्गा छनौटको काम भइरहेको दाहालले बताए ।
