.jpg)
चैत ४, काठमाडौं । बैंक तथा वित्तीय संस्था परिसंघ नेपाल (सीबीफीन) र एशियाली विकास बैंक (एडीबी) ले आत्मनिर्भर अर्थतन्त्रका लागि संयुक्त रुपमा काम गर्ने भएका छन् ।
नेपाल भ्रमणमा आएका एडीबीका प्रतिनिधिमण्डलले वित्तीय क्षेत्रको सुदृढीकरण, स्थानीय तथा उत्पादनशील उद्योगलाई ऋणमा सहज पहुँच पुर्याउने र अन्य पूर्वाधारको माध्यमबाट स्वदेशी अर्थतन्त्रको प्रवर्द्धनका लागि संयुक्त रुपमा काम गर्ने भएका हुन् ।
शुक्रवार सीबीफीनले आयोजना गरेको बैठकमा दक्षिण एशिया मामिला हेरिरहेका एडीबी मनिलाका उप- महानिर्देशक मनमोहन प्रकाशले नबिन र स्वदेशी कच्चा पदार्थमा आधारित उत्पादनमा केन्द्रित भएर काम गर्ने बताए । उनले क्रेडिट, विश्वव्यापी बजार अवसरहरु, अन्वेषण र नयाँ प्रविधि उपलब्ध गराई देशको आफ्नै स्रोत साधनले अर्थतन्त्रलाई दिगो बनाउनुपर्ने बताए ।
‘साना तथा मझौला व्यवसयीहरुलाई विनाधितो कर्जा उपलब्ध गराएमा मात्रै उनीहरुले दिगो रुपमा आफ्नो व्यवसाय संचालन गर्न सक्छन, एमएसएमईहरुबाट ठूलो रोजगारी सृजना हुने हुनाले यी उद्योगहरूलाई वित्तीय पहुच, बजार र पूर्वाधारसँगै सीपको सहित सहयोग गरिनुपर्छ’, उनले भने ।
उनले कुनै प्रक्रियागत बाधा बिना उचित ब्याजदरमा जोड दिएमा एमएसएमईहरुलाई प्रभावकारी रूपमा सञ्चालन गर्न धितोरहीत ऋण दिन सकेमा मात्र उनीहरु बाँच्न सक्ने बताए ।बैठकमा सीबीफीनका अध्यक्ष पवन कुमार गोल्यानले आजको आर्थिक संकटको बेलामा एडीबीले नेपाललाई एक अर्ब डलरभन्दा बढीको सहुलियत ऋण उपलब्ध गराउन अनुरोध गरे ।
एडीबीले ऋण उपलब्ध गराएमा तरलताको समस्या पनि समाधान हुने र बैंक तथा वित्तीय संस्थाहरूले निजी क्षेत्रलाई लक्ष्यअनुरूप ऋण पनि दिन सक्ने गेल्यानको भनाई थियो ।