चैत २३, काठमाडौं । धितोपत्र दोस्रो बजारमा सर्वाधिक हिस्सा ओगटेका वाणिज्य बैंकहरूको शेयरमूल्य लगातार ओरालो यात्रामा छन् । नेप्सेले हालसम्मकै उच्च विन्दु कायम गरेको दिन भदौ २ गतेको तुलनामा सबै वाणिज्य बैंकहरूको शेयरमूल्य घट्दै गएको छ । भदौ २ गते ३ हजार २०० विन्दु पार गरेको बजार चैत २३ गते २ हजार ४२८ दशमलव ६६ विन्दुमा झरेको छ ।
भदौ २ गते २ हजार १०० दशमलव २५ विन्दुमा रहेको बैंकिङ समूहको उपसूचक चैत २३ गते १ हजार ५९३ दशमलव १० विन्दुमा झरेको छ । नेप्सेले ऐतिहासिक विन्दु कायम गरेको दिनको तुलनामा बैंकिङ समूहको उपसूचक ५०७ दशमलव १५ अंकले घटेको हो । नेप्से परिसूचक पनि उच्च विन्दुदेखि ७६९ दशमलव ९४ अंक तल झरिसकेको छ ।
समग्र बजार घट्नु र यस वर्ष बैंकहरूले दिएको बोनस शेयरमा मूल्य समायोजनबाट पनि बैंकहरूको शेयरमूल्य घटेको हो । यस वर्ष वाणिज्य बैंकहरुमध्ये एनआईसी एशिया बैंकबाहेक सबै बैंकले बोनस शेयर वितरण गरेका छन् ।
योबीचमा नेपाल बैंकको शेयरमूल्य सर्वाधिक प्रतिशत घटेको छ । नेप्सेले ऐतिहासिक रेकर्ड कायम गरेको दिनको तुलनामा नेपाल बैंकको शेयरमूल्य ४३ दशमलव ९७ प्रतिशत घटेको छ । भदौ २ गते प्रतिकित्ता रू. ५६४ रहेको नेपाल बैंकको शेयरमूल्य चैत २३ गते प्रतिकित्ता रू. ३१६ मा झरेको हो । नेपाल बैंकले यस वर्ष १४ प्रतिशत बोनस शेयर वितरण गरेको छ । नेप्सेले बोनस शेयरपछिको मूल्य रू. ३७८ दशमलव ६८ तोकेको थियो । समायोजन मूल्यभन्दा पनि नेपाल बैंकको शेयरमूल्य कम कायम भएको छ ।
वाणिज्य बैंकहरूमध्ये सर्वाधिक शेयरमूल्य नबिल बैंकको रहेको छ । नबिल बैंकको शेयरमूल्य भदौ २ गते रू. १ हजार ४९५ रहेको थियो । यस वर्ष ३३ दशमलव ६० प्रतिशत बोनस शेयर वितरण गरेको बैंकको शेयरमूल्य चैत २३ गते भने रू. ९६५ कायम भएको छ । नेप्सेको ऐतिहासिक रेकर्ड कायम गरेको दिनको तुलनामा नबिल बैंकको शेयरमूल्य ३५ दशमलव ४५ प्रतिशत कम भएको हो । यस अवधिमा यो बैंकको प्रतिकित्ता शेयरमूल्य रू. ५३० घटेको छ ।
भदौ २ गतेसम्म सिभिल बैंक र सेञ्चुरी बैंकको मात्र शेयरमूल्य रू. ३०० भन्दा कम थियो । चैत २३ गतेसम्मको तथ्याङ्क अनुसार १४ बैंकको शेयरमूल्य रू. ३०० भन्दा कम रहेको छ । हाल सूचीकृत २६ वाणिज्य बैंकमध्ये नेपाल बङ्गलादेश, नेपाल इन्भेष्टमेन्ट र हिमालयन बैंकको शेयर कारोबार भने रोक्का रहेको छ ।
