इलाम । इलाम नगरपालिका–९ सेरास्थित फाल्गुनन्द सुकिलुम्बा विमास्थलमा नेपाल वायुसेवा निगमले परीक्षण उडान गरेको छ । निगमले काठमाडौंबाट फाल्गुनन्द सुकिलुम्बा विमास्थलमा नियमित हवाई सेवा दिने उद्देश्यले परीक्षण उडान गरेको हो ।
फाल्गुनन्द सुकिलुम्बा विमास्थलमा निगमको परीक्षण उडान सफल समेत भएको छ । काठमाडौंदेखि इलामका लागि भएकोे पहिलो उडान सफल भएको नेपाल नागरिक उड्डयन प्राधिकरणका इञ्जिनीयर विनायक भट्टराईले बताए ।
विमानस्थलको धावनमार्ग कालोपत्र भएपछि परीक्षण उडान गरिएको हो । यसअघि धावनमार्ग पक्की नभई तारा एयरले २०७५ सालमा परीक्षण उडान गरेको थियो । अब आगामी फागुन ८ गतेदेखि व्यावसायिक उडान शुरू हुने बताइएको छ । प्राधिकरणका इञ्जिनीयर भट्टराईले परीक्षण उडानमा मौसमले राम्रो साथ दिएको बताए । उनका अनुसार सुकिलुम्बा विमानस्थलको धावनमार्ग पक्की भएपछि बुधवार परीक्षण उडान गरिएको हो । त्रिभुवन अन्तरराष्ट्रिय विमानस्थल काठमाडौंबाट सुकिलुम्बा विमानस्थलमा जहाज अवतरण गर्न करिब ५५ मिनेट समय लागेको उनको भनाइ छ ।
निगमको तर्फबाट क्याप्टेन पेम्बा शेर्पा र रक्सित मल्लललगायतको प्राविधिक टोलीले यस विमानस्थलमा सफल उडान गराएको बताइएको छ । ७०० मिटर लम्बाइ र ६० मिटर चौडाइको धावनमार्गसहितको विमानस्थलको शिलान्यास २०६८ सालमा भएको थियो । समुद्र सतहबाट १ हजार १५० मिटर उचाइमा रहेको यो विमानस्थलमा प्रायः घाम लागिरहने भएकाले जहाज उडानका लागि उपयुक्त भएको बताइएको छ । यो विमानस्थलबाट जहाज उडान सञ्चालनमा आएपछि पूर्वी पहाडी जिल्ला र सीमापारि भारतका दार्जिलिङ, सिक्किमलगायतका बासिन्दाका लागि सहज हुने विश्वास लिइएको छ । तारा एयरले आगामी फागुन ८ गतेदेखि व्यावसायिक उडान गर्ने सम्बन्धमा इलाम नगरपालिकासँग सम्झौतासमेत गरिसकेको छ । रासस