१४ जना सांसदको कारवाही र कुलमान नियुक्तिसम्बन्धी मुद्दा प्रधानन्यायाधीको इजलासमा

१५ बाट बढेर १७ % पुगेको विद्युत् चुहावट फेरि १४ % मा झर्‍यो

पुस ११, काठमाडौं। नेपाल विद्युत् प्राधिकरणले चालू आर्थिक वर्ष२०७८/७९ को पहिलो चार महीनामा प्रणालीमा रहेको विद्युत् चुहावटलाई घटाएर १४ दशमलव ३५ प्रतिशतमा झारेको छ। नियमित रुपमा विद्युत् आपूर्ति र प्राविधिक तथा गैह्रप्राविधिक चुहावट नियन्त्रणका लागि सञ्चालन गरिएको अभियानबाट प्राधिकरण गत आवमा प्रणालीको १७ दशमलव १८ प्रतिशतको चुहावटलाई चालू आवको चार महीनामा २ दशमलव ८३ प्रतिशत विन्दुले घटाएर १४ दशमलव ३५ प्रतिशतमा सीमित गर्न सफल भएको छ। कात्तिकसम्ममा प्रणालीमा रहेको चुहावटमध्ये वितरणतर्फ ९.२४ प्रतिशत छ भने बाँकी प्रसारण तथा उत्पादनतर्फको हो। गत वर्षको कात्तिकसम्म वितरणतर्फको चुहावट १२ दशमलव शून्य १ प्रतिशत रहेको थियो। गत आवको चार महीनाको तुलनामा यस वर्ष वितरण तर्फको चुहावट २ दशमलव ७७ प्रतिशत विन्दुले घटेको हो। प्राधिकरणले चालू  आवमा विद्युत चुहावट १५ दशमलव ५ प्रतिशतमा झार्ने लक्ष्य राखेको छ। पहिलो चार महिनामै लक्ष्यभन्दा कम चुहावट रहेकाले आवको बाँकी अवधिमा लक्ष्य पूरा हुने देखिएको प्राधिकरणका कार्यकारी निर्देशक कुलमान घिसिङले बताए।   आव २०७२/७३ मा २५ दशमलव ७८ प्रतिशत रहेको विद्युत चुहावटलाई घटाएर प्राधिकरणले आव २०७६/७७ मा १५ दशमलव २५ प्रतिशतमा झारेको थियो। तर, आव २०७७/७८ मा चुहावट १ दशमलव ९१ प्रतिशत विन्दुले बढेर १७ दशमलव १८ प्रतिशत पुगेको थियो।  कार्यकारी निर्देशक घिसिङले चुहावट नियन्त्रण अभियान प्रभावकारी रुपमा चलाइएको, सब- स्टेसनको क्षमता बृद्धि गर्ने, कन्डक्टर थप्ने, ओभरलोड ट्रान्सफर्मर फेर्ने, थ्री फेज मिटरको प्रयोगलाई प्रोत्साहन गर्ने लगायतका कदमको परिणाम चुहावट नियन्त्रणमा देखिएको बताए। उद्योगहरुमा विद्युत आपूर्ति बढेको र चुहावट नियन्त्रण अभियानलाई अझै सशक्त तथा प्रभावकारी बनाएर चालु आवका लागि राखिएको लक्ष्यभन्दा चुहावटलाई तल झार्ने गरी काम अगाडि बढाइएको पनि घिसिङले बताए।  ‘गैह्रप्राविधिक चुहावट नियन्त्रणका लागि चोरी नियन्त्रण, महशुल बक्यौता असुलीमा कडाइ, मिटर वाइपास तथा हुकिङ गरी चोरी गर्नेलाई कडा कारवाही गर्ने, बन्द मिटर फेर्ने, मिटर लिन प्रोत्साहित गर्ने, मिटर रिडिङ नभएको (स्टक युनिट) ग्राहकको पहिचान गरी रिडिङ गर्ने काम अभियानकै रुपमा चलाइएको छ’, उनले भने।  ‘चोरी नियन्त्रण गर्दा कति ठाउँमा हाम्रा कर्मचारीमाथि आक्रामण भएको छ, यस्तो अवस्थामा पनि वितरण तथा ग्राहक सेवाअन्तर्गतका व्यवस्थापक र दिनरात नभनी खटिएका कर्मचारी, गृह प्रशासनलगायत सबैको साथ र सहयोगमा चुहावट घटाउन सफल भएका छौं।’   काठमाडौं उपत्यकामा जाडोमा र तराई क्षेत्रमा गर्मीमा चुहावट बढ्ने उल्लेख गर्दै घिसिङले प्राविधिक र गैरप्राविधिक चुहावट नियन्त्रणका लागि मुलुकभर चालिएको अभियानलाई अझै सशत्त र प्रभावकारी बनाएर चालु आवको लक्ष्य हासिल गरिने बताए।  प्राधिकरण व्यवस्थापनले विद्युत् चुहावट नियन्त्रण, विद्युतीकरण  र सेवाप्रवाह सुधारमा केन्द्रित रहेर प्राधिकरणका सात प्रादेशिक तथा दुई प्रदेश डिभिजन कार्यालयका प्रमुखहरु र मातहतका वितरण केन्द्र प्रमुखहरुसँग कार्यसम्पादन सम्झौता गर्ने छ।  कार्यकारी निर्देशक घिसिङले थपे, ‘उपयुक्त स्थानमा उपयुक्त व्यक्ति भन्ने अवधारणाका आधारमा जिम्मेवारी दिन शुरु गरिएको छ, ग्राहकलाई  दिने सेवामा सुधार गर्न, ग्राहकलाई थप विद्युत दिन, विद्युत् चुहावट नियन्त्रण, विद्युत् महशुल वक्यौता असुली, विद्युतीकरणलगायतलाई मुख्य मानक मानी ग्राहक तथा वितरण केन्द्र प्रमुखसँग कार्यसम्पादन गर्दै छौं, यसबाट चुहावट नियन्त्रण, विद्युतीकरण, सेवा प्रवाह लगायतमा सुधार हुने छ।’