लगातार तेस्रो त्रैमासमा पनि गूगल सर्च इन्जिनको आम्दानीमा नयाँ रेकर्ड, शेयरलाई २० भागमा टुक्याउने

  माघ १९, काठमाडौं । अमेरिकी बहुराष्ट्रिय सर्च इञ्जिन गूगलको मातृ कम्पनी अल्फाबेटले गएको त्रैमासमा अहिलेसम्मकै उच्च त्रैमासिक आम्दानी गरेको छ । गत वर्षको अक्टोबर–डिसेम्बर त्रैमासमा कम्पनीको विक्री ३२ प्रतिशतले बढी ७५ अर्ब ३० करोड डलरमा उक्लिएको छ । योसँगै कम्पनीको विक्रीले लगातार तेस्रो त्रैमासमा पनि नयाँ उचाई छोएको हो । यो रिफिनिटिभको सर्वेक्षणमा वित्तीय विश्लेषकहरुले गरेको औसत अनुमानभन्दा धेरै हो । समीक्षा अवधिमा कम्पनीले कुल ७२ अर्ब डलर बराबरको विक्री गर्ने अपेक्षा सर्वेक्षणमा गरिएको थियो ।  कोरोना भाइरसको महामारी बीच उपभोक्ताहरुले गूगलको सर्च इञ्जिनको प्रयोग गरेर अनलाइन शपिङ गर्ने क्रममा भएको वृद्धि र विज्ञापनदाताहरुले आफ्नो मार्केटिङ बजेट बढाउँदा अल्फाबेटको आम्दानी बढेको हो । इन्टरनेटमा आउने विज्ञापनबाट सबैभन्दा धेरै आम्दानी गर्ने कम्पनी हो गूगल । निकट भविष्यमा यसको वृद्धि रोकिदै नरोकिने देखिएको छ । कोरोना भाइरसको महामारीका कारण डिजिटल विज्ञापनमाथिको निर्भरता तीव्र पारेको छ । यसले पनि कम्पनीले टेवा पाएको हो ।  सन् २०२१ भर भने कम्पनीको विक्री ४१ प्रतिशतले बढेर २ खर्ब ५८ अर्ब डलरको नयाँ उचाईमा उक्लिएको छ । सन् २०२० मा भने विक्री १३ प्रतिशतले मात्रै बढेको थियो । गत वर्ष अल्फाबेटको कूल आम्दानीमा युटयूब समेत गूगलको विज्ञापन व्यवसायको अनुपात ८१ प्रतिशत रहेको छ । पछिल्लो समय अमेरिकी अनलाइन खुद्रा कम्पनी एमाजन र चिनियाँ कम्पनी बाइटडान्सको शर्ट भिडियो शेयरिङ एप टिकटकले विश्वको विज्ञापन बजारमा गूगलको हिस्साको स–साना हिस्सा आफ्नो पोल्टामा पारिरहेका छन् । तर बजारमा रहेको गूगलको वचश्र्वमा खासै धेरै कमी नआउने विश्लेषकहरु बताउँछन् ।  गूगलको क्लाउडलगायत सहायक व्यवसायले पनि समग्र विक्री बढाउन टेवा दिइरहेको छ । गत वर्षको अन्तिम त्रैमासमा अल्फाबेटको त्रैमासिक मुनाफा २० दशमलव ६ अर्थात् प्रतिकित्ता शेयरमा ३० डलर ६९ सेन्ट रहेको छ । योसँगै त्रैमासिक मुनाफा लगातार चौथो त्रैमास पनि नयाा उचाईमा पुगेको छ । गत वर्षभर भने कम्पनीको मुनाफा अघिल्लो वर्षको तुलना ८९ प्रतिशतले बढी ७६ अर्ब डलरमा  उक्लिएको थियो । मुनाफा बढेसँगै कम्पनीको नगद सञ्चिति पनि गत वर्ष ३ अर्ब डलरले बढेर १ खर्ब ३९ अर्ब ६० करोड डलरमा पुगेको छ ।  पछिल्लो समय शेयरमूल्य बढेपछि अल्फाबेटले एउटै शेयरलाई २० हिस्सामा टुक्रयाउने योजना बनाएको छ । यसको अर्थ जुलाई १ सम्ममा कम्पनीको शेयरधनीका रुपमा रहेका लगानीकर्ताहरुले आफूसँग रहेको हरेक एक कित्ता शेयरको लागि थप १९ कित्ता शेयर पाउनेछन् । शेयर टुक्रयाउने यो योजनालाई कम्पनीका शेयरधनीहरुले अनुमति दिन बाँकी छ । यो कदम पछि कम्पनीको शेयर झनै सुलभ हुने छ । अमेरिकी बुहराष्ट्रिय प्रविधि कम्पनी एप्पल इंक र विद्युतीय सवारी साधन निर्माता कम्पनी टेस्लाको शेयर पनि सन् २०२० मा टुक्रयाएपछि बढेको थियो । एजेन्सीको सहयोगमा