तेइस वर्षकी रानी पासवानले यो उमेरमा जे जस्ता कहालीलाग्दा घटना भोगिन्, त्यसको वृत्तान्त एकैछिनमा भन्न उनी सक्दिनन् । १९ वर्षमा महोत्तरीको भंगाहा–७ का छोटे पासवानसँग विवाह गरेको चार वर्ष नबित्दै २ छोरीकी आमा भइसकेकी थिइन् । डेढ लाख कर्जा लिएर २०७८ चैतमा वैदेशिक रोजगारीका लागि साउदी अरब उडेका उनका श्रीमान् ९ महिनापछि बाकसमा फर्किए । उनले सुनाइन्, ‘त्यसपछि मेरा झनै धेरै दुःखका दिन सुरु भए ।’