नेप्सेको ओरालो यात्रा कायमै, २४०० को लाइनमा आएको सूचक २०२२ कै सबैभन्दा तल्लो विन्दुमा

चैत २१, काठमाडौं । नेपालको शेयर बजार सन् २०२२ लागेपछि कै सबैभन्दा तल्लो विन्दुमा आएको छ । गत पुस ६ गते २ हजार ४१५ विन्दुबाट माथि उठेको बजार त्यसपछि २ हजार ९०० विन्दुमाथि पुगेको थियो । चैत २१ गते बजार पुनः २ हजार ४९८ विन्दुमा आएको छ । साताको दोस्रो दिन एक समय ८ अंकसम्म बढेको बजार अन्तत स् १४ दशमलव ८८ अंकले घटेर बन्द भएको छ । कारोबार रकम पनि १ अर्ब ५८ करोड रुपैयाँमा सीमित भएको छ । इमर्जीङ नेपालको सर्वाधिक ६ करोड ३९ लाख रुपैयाँको शेयर किनबेच हुँदा नबिल बैंकको ५ करोड ६७ लाख रुपैयाँ, सूर्य लाइफको ५ करोड ६३ लाख रुपैयाँ, अरुण भ्यालीको ३ करोड ९१ लाख रुपैयाँ र नेपाल टेलिकमको ३ करोड ६९ लाख रुपैयाँको शेयर किनबेच भएको छ । राष्ट्र उत्थान लघुवित्त, नेस्डो समृद्ध लघुवित्तको समान १०र१० प्रतिशत मूल्य बढ्दा इमर्जीङ नेपालको ९ प्रतिशत मूल्य बढेको छ । कर्पोरेट र कर्णाली विकास बैंक तथा प्रभु र सिद्धार्थ इन्स्योरेन्सको सर्वाधिक ३र४ प्रतिशतसम्म मूल्य घटेको छ ।  बजार अब कता जान्छ भनेर लगानीकर्तालाई कौतुहलता भएको छ । सोमवार बजार खुलेको केही समयसम्म २ हजार ५०० विन्दुकै वरिपरि रहेकोमा अन्तिम समयमा विक्रेता हावी भएसँगै बजार तल झरेको छ । ब्याजदर वृृद्धि,वित्तीय प्रणालीमा तरलता अभावले गर्दा शेयर बजार प्रभावित भएको हो । यस बीचमा कम्पनीहरुको बोनस शेयर पनि सूचीकृत भएको छ । यसले बजारमा सप्लाई बढेकाले पनि बजार प्रभावित भएको हो ।  २ हजार ५०० विन्दू वरीपरिमा बलियो सपोर्ट रहेको प्राविधिक विश्लेषक बताउँछन् । त्यसोत बजार ३ हजार २०० विन्दुबाट २ हजार ४९८ विन्दुमा आइपुग्दा कम्पनीहरुको शेयर मूल्य धेरै नै सस्तिएको छ । सोमवार कारोबारमा आएका २२६ ओटा धितोपत्रमध्ये दुई ओटा धितोपत्रको मूल्यमा सकारात्मक सर्किट लागेको छ । राष्ट्र उत्थान लघुवित्त वित्तीय संस्था र नेष्डो समृद्ध लघुवित्त वित्तीय संस्थाको शेयरमूल्य अघिल्लो कारोबार दिनको तुलनामा १० प्रतिशतका दरले वृद्धि भएसँगै सकारात्मक सर्किट लागेको हो । राष्ट्र उत्थान लघुवित्तको शेयरमूल्य प्रतिकित्ता रू. १ हजार ५९६ दशमलव ५० र नेष्डो समृद्ध लघुवित्त वित्तीय संस्थाको रू. १ हजार २७७ दशमलव ३० कायम भएको छ । ती दुबै कम्पनीले केही समय अगाडि आईपीओ निष्कासन गरेका थिए । सोही कारण यी दुबै कम्पनीको शेयरमा विक्रेताभन्दा क्रेता धेरै भएकाले शेयरमूल्य बढेको हो । त्यसैगरी सोमवार सिटीजन्स म्युचुअल फण्ड २ का इकाई मूल्य ५ दशलमव ६६ प्रतिशत घटेर रू। १० कायम भएको छ । त्यसैगरी दोस्रोमा कर्णाली डेभलपमेन्ट बैंकको शेयरमूल्य ४ दशलमव २८ प्रतिशत घटेर रू.३८० कायम भएको छ ।  यो दिन सर्वाधिक शेयर खरीदविक्री इमर्जिङ नेपालको भएको छ । कम्पनीको रू. ६ करोड ३९ लाख बराबरको शेयर खरीदविक्री भएको हो । कम्पनीको शेयरमूल्य प्रतिकित्ता रू. १ हजार ४७० कायम भएको छ । सर्वाधिक शेयर खरीदविक्री गर्ने दोस्रोमा नबिल बैंक रहेको छ । उक्त कम्पनीको रू. ५ करोड ६७ लाख बराबरको शेयर  खरीदविक्री भएको हो ।  कारोबारमा आएका १३ ओटै समूहको समग्र समूहगत परिसूचक घटेसँगै नेप्से परिसूचक घटेको छ । बैंकिङ समूहको परिसूचक शून्य दशमलव २५ प्रतिशत, ब्यापार समूहको १ दशमलव ३४ प्रतिशत,होटल एण्ड टुरिजम समूहको शून्य दशमलव ७३ प्रतिशत,विकास बैंक समूहको शून्य दशलमव ५७ प्रतिशत, हाइड्रोपावर समूहको शून्य दशमलव ७७ प्रतिशत,वित्त समूहको शून्य दशलमव ६८ प्रतिशत,निर्जीवन बीमा समूहको १ दशमलव ६६ प्रतिशत,उत्पादन तथा प्रशोधन समूहको शून्य दशलमव २६ प्रतिशतले घटेको छ ।  यसैगरी अन्य समूहको १ दशमलव ०४ प्रतिशत,लघुवित्त समूहको शून्य दशलमव ४५ प्रतिशत,जीबन बीमा समूहको शून्य दशलमव ८४ प्रतिशत,म्युचुअल फण्ड समूहको शून्य दशमलव १ प्रतिशत र लगानी समूहको परिसूचक शून्य दशलमव ४९ प्रतिशतका दरले घटेको हो ।