काठमाडौं (अस) । सन्दर्भ ब्याजदर बढाउन माग गर्दै सहकारीकर्मीले संघीय सहकारी विभागमा धर्ना दिने भएका छन् । बैंक तथा वित्तीय संस्थाको ब्याजदर वृद्धिले सहकारी संस्थालाई अफ्ठ्यारो परे पनि विभागले सन्दर्भ ब्याजदर नबढाएको भन्दै दबाब दिन धर्ना दिन लागिएको हो ।
विभागका रजिस्ट्रारको संयोजकत्वमा हुने सन्दर्भ ब्याजदर निर्धारण समितिको बैठक मंगलवार दिउँसो बस्दै छ । बैठकबाटै सन्दर्भ ब्याजदर तोक्न दबाब दिन बिहान ११ बजे विभागमा धर्ना कार्यक्रम तय गरिएको छ ।
सोमवार राष्ट्रिय सहकारी महासंघमा बसेको केन्द्रीय तथा जिल्ला तथा विषयगत संघहरूको बैठकले महासंघको अगुवाइमा विभागमा धर्ना दिने निर्णय गरेको हो । महासंघको बैठकपछि उपत्यकाका तीनओटै जिल्ला तथा विषयगत संघहरूले धर्नामा उपस्थित हुन आग्रह गरेका छन् ।
बैंक तथा वित्तीय संस्थाहरूले फागुन १ गतेदेखि निक्षेपको ब्याजदर बढाएपछि सहकारीमा पनि ब्याजदर बढाउन दबाब बढेको छ । हाल सहकारीमा सन्दर्भ ब्याजदर १४ दशमलव ७५ प्रतिशत रहेको छ । राष्ट्रिय सहकारी महासंघले मंगलवार विभागका रजिस्ट्रारलाई ज्ञापनपत्र बुझाउँदै तीन दिनभित्र निचोडमा पुग्न समयसीमा समेत दिएको थियो । महासंघले सन्दर्भ ब्याजदर १७ प्रतिशत नबढ्ने गरी आधारदरमा ६ प्रतिशतसम्म प्रिमियम लिन पाउने व्यवस्था गर्न सुझाएको छ । तर, सहकारी ऐन तथा नियमावलीमा आधारदरको प्रावधान उल्लेख छैन ।